Batumelebi | ბათუმში ყინულის მოედნით სარგებლობა გაიაფდა ბათუმში ყინულის მოედნით სარგებლობა გაიაფდა – Batumelebi
RU | GE  

ბათუმში ყინულის მოედნით სარგებლობა გაიაფდა

 

 

ბათუმის  საკრებულომ  სპორტულ-ახალგაზრდული ცენტრის ყინულის მოედნით სარგებლობის ახალი ტარიფები  დაამტკიცა. როგორც „ბათუმის სპორტულ-ახალგაზრდული ცენტრის“ დირექტორი ირაკლი ბერიძე აცხადებს, ტარიფები შემცირდა. 

 

„ტარიფები შემცირებულია. მაგალითად აქამდე ნახევარი საათით მომსახურეობა ყინულის მოედანზე მასწავლებელთან ერთად ღირდა 10 ლარი. საუბარია შემთხვევაზე როცა ბავშვი მოდის და ინდივიდუალური მომსახურება ჭირდება.  ახლა ნახევარი საათი არის განსაზღვრული 8 ლარით.   ასევე 4-15 წლამდე ასაკის ბავშვებისათვის 12 საათი თვეში გახდა 20 ლარი. ეს ოცი ლარი არის მინიმალური რაც შეიძლებოდა გაკეთებულიყო. ანალოგიური მომსახურეობა თბილისში 85 ლარი ღირს,“ – აცხადებს ირაკლი ბერიძე.

 

ყინულის მოედნით სარგებლობა ერთ ადამიანს ერთი საათის განმავლობაში ხუთი ლარი დაუჯდება.  ერთი თვის  აბონიმენტი (12 საათი) კი 50 ლარი.

 

იმ შემთხვევაში თუ საკუთარი ციგურები არ გაქვთ, და ყინულის მოედნის კუთვნილი ციგურებით გსურთ სრიალი, ერთი საათის ღირებულება 6 ლარია,  ერთთვიანი აბონიმენტი (12 საათი) 60 ლარი.

 

ნახევარი საათით მწვრთნელის მომსახურება 5 ლარი. ასევე 5 ლარი ღირს  ნახევარი საათით ქორეოგრაფის მომსახურეობა.

 

4-დან 15 წლამდე მოზარდებისთვის ჯგუფური მომსახურეობის ღირებულება ერთი თვით (12 საათი)  20 ლარია. სასწავლო-საწვრთნო შეკრებებისთვის ერთი საათით დარბაზით სარგებლობის  ღირებულება 100 ლარია.    საქართველოს, აჭარისა და ბათუმის სახელით მოასპარეზე  სპორტსმენებისა და გუნდებისათვის კი დარბაზით სარგებლობა უფასოა.

 

ასევე სოციალურად დაუცველი, დედ-მამით ობოლი, მრავალშვილიანი,  მარჩენალდაკარგული, მარტოხელა დედების შვილებისათვის, საქართველოს ტერიტორიული მთლიანობისათვის დაღუპულთა ოჯახის წევრებისათვის  ყინულის მოედნით სარგებლობა უფასო იქნება.

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"