გუშინ ღამით, ბათუმში განვითარებული მოვლენების შედეგად დაზიანებულია ქალაქის ინფრასტრუქტურა. ბათუმის მერიის ინფორმაციით, მოშლილია გზაგამყოფ ზოლში არსებული დეკორატიული ღობეები, დაზიანდა დეკორატიული ფილები, შუქნიშანი და საგზაო ნიშნები.
მერიის პრესსამსახურის ინფორმაციით, ქალაქის დასუფთავება დილის 5 საათიდან დაიწყო და ამ დროისთვის დასასრულს უახლოვდება. პარალელურად მიმდინარეობს აღდგენითი სამუშაოები – “თითქმის აღდგენილია დეკორატიული ფილები, დღის ბოლომდე მოხდება დაზიანებული საგზაო ნიშნების აღდგენაც. რაც შეეხება დაზიანებულ შუქნიშანს, საჭიროების შემთხვევაში, მოხდება მისი ახლით ჩანაცვლება. დაკარგულია დეკორატიული გზაგამყოფი ღობეების ნაწილი. ამ ეტაპზე მიმდინარეობს მოხსნილი ღობის ხელახალი მონტაჟი. წუხელ ასევე დაზიანდა ხე-მცენარეები, რის გამოც აუცილებელი გახდა ხის მოჭრისა და გასხვლის სამუშაოების ჩატარება. აღდგენითი ღონისძიებები დღის ბოლომდე დასრულდება” – წერია მერიის მიერ გავრცელებულ განცხადებაში.
