რამდენიმე წუთის წინ აჭარის მთავრობის თავმჯდომარე ზურაბ პატარაძე პრეზიდენტის ადმინისტრაციის უფროსს გიორგი აბაშიშვილს და უშიშროების საბჭოს მდივანს დავით რაქვიაშვილს შეხვდა. შეხვედრა დახურული იყო.
შეხვედრის შემდეგ დავით რაქვიაშვილმა აჭარის საზოგადოებრივი მაუწყებლის ეთერში ისაუბრა. მისი თქმით: სიტუაცია ბათუმში ამ დროისთვის კონტროლირებადია.
„ახლა მნიშვნელოვანია ის, რომ აქციას მსგავსი განვითარება აღარ მოჰყვეს. მე ვერ ვხედავ ამის მყისიერ საფრთხეს. კარგად თუ დავაკვირდებით ვნახავთ, რომ ამ პროცესს რამდენიმე მდგენელი ჰქონდა, მაგრამ ყველამ განსაკუთრებული პასუხისმგებლობით უნდა გავიაზროთ რა მოხდა. ამიტომ მთლიანად ამ პროცესის შეფასება და პასუხიმგებლობით მოკიდება იმ საკითხისადმი რასაც ქვია სახელმწიფოებრიობა, ისე გამოხატვის თავისუფლება მოგვცემს იმის შესაძლებლობას, რომ მსგავსი კრიზისი თავიდან ავიცილოთ.
რაქვიაშვილი მიიჩნევს, რომ პოლიციაზე შეტევას აქციის ბოლო წუთებში სახელმწიფომ ადექვატური პასუხი გასცა. რაც შეეხება იმას თუ „დინამიკაში როგორც ჩამოყალიბდა ეს პროცესი და როგორ ფორმირდებოდა ის, ამაზე პასუხები გასაცემია“ – განაცხადა უშიშროების საბჭოს მდივანმა.
პრეზიდენტის ადმინისტრაციის უფროსი და უშიშროების საბჭოს მდივანი პრეზიდენტის დავალებით ბათუმში რჩებიან.
