ამ ორგანიზაციის ხელმძღვანელი თომა კაკაბაძე ზემოთ ჩამოთვლილ ყველა იმ ტერმინს, რომელსაც საზოგადოება შშმ პირების მიმართ არ უნდა იყენებდნეს „მოსასპობ“ სიტყვებს უწოდებს. ის ყველას და მათ შორის ჟურნალისტებსაც სთხოვს ხელი შეუწყონ შშმ პირების მიმართ სწორი ტერმინოლოგიის გამოყენების დამკვიდრებას.
„ხშირად იყენებენ შშმ პირების მიმართ სიტყვას – ინვალიდი, რაც დაბრაკულს, უუნაროს და გამოუსადეგარს ნიშნავს. როცა ადამიანი შშმ პირია და არაადაპტირებულ გარემოში ცხოვრობს, მაქსიმალურად ხელი ეშლება, რომ გარეთ გამვიდეს და ამას ემატება შეურაცხმყოფელი ტერმინების გამოყენება მის მიმართ, ვიღაც მას დაბრაკულს ეძახის და ეს მისთვის დამამცირებელია. ეს შემდეგ განაპირობებს ადამიანის ჩაკეტვას და უფრო და უფრო კარგავს საზოგადოებასთან კონტაქტის დამყარების უნარს, ამიტომ ვთხოვ ყველას, ნუ გამოიყენებენ ამ სიტყვებს.“
თომას ორგანიზაცია „ცვლილებები თანაბარი უფლებებისთვის“ შშმ პირების მიმართ სწორი ტერმინოლოგიის დამკვიდრების მიზნით პროექტს ახორციელებს. ამ პროექტის ფარგლებში ორგანიზაცია დღეს ბათუმის დემოკრატიული ჩართულობის ცენტრში ჟურნალისტებს შეხვდა.
ორგანიზაციის წევრებმა შეხვედრაზე ჟურნალისტებს წინასწარ მომზადებული დოკუმენტი გადასცეს, სადაც იმ ტერმინების შესახებაა განმარტებული, რომელთა დამკვიდრებასაც ისინი ითხოვენ ან ეწინააღმდეგებიან.
შეხვედრას ესწრებოდა „ჟურნალისტური ეთიკის ქარტიის“ საბჭოს წევრი ნათია როყვა, რომელმაც ორგანიზაციის წევრებს განუმარტა იმის შესახებ, თუ რა ფორმით შეიძლება მიმართონ ქარტიას იმ შემთხვევაში, თუ რომელიმე მედიაგამოცემა მათ უფლებებს დაარღვევს.
