Batumelebi | სასამართლომ შაჰინის სკოლის სარჩელი არ დააკმაყოფილა – სკოლა დაიხურა სასამართლომ შაჰინის სკოლის სარჩელი არ დააკმაყოფილა – სკოლა დაიხურა – Batumelebi
RU | GE  

სასამართლომ შაჰინის სკოლის სარჩელი არ დააკმაყოფილა – სკოლა დაიხურა

დღეს, 20 თებერვალს, თბილისის საქალაქო სასამართლომ შაჰინის სკოლის საჩივარი ავტორიზაციის საბჭოს წინააღმდეგ არ დააკმაყოფილა. ეს იმას ნიშნავს, რომ შაჰინის სკოლა ფუნქციონირებას ვეღარ გააგრძელებს.

სკოლის დირექტორი ელგუჯა დავითაძე „ბათუმელებთან“ აცხადებს, რომ ისინი სასამართლოს პირველი ინსტანციის გადაწყვეტილებას სააპელაციო სასამართლოში გაასაჩივრებენ, თუმცა საქმის მეორე ინსტანციაში განხილვამდე სკოლაში სასწავლო პროცესი ვეღარ აღდგება და მოსწავლეებს სხვა სკოლებში გადასვლა მოუწევთ.

შაჰინის სკოლის ადმინისტრაცია ავტორიზაციის საბჭოს გადაწყვეტილების შეჩერებას მოითხოვდა.

„12 დღის ვადაში უნდა გავასაჩივროთ სასამართლოს გადაწყვეტილება და მივყვებით იურიდიულ ნაბიჯებს. თუმცა ჩვენ ახალი ლიცენზიის აღებაზეც დავიწყებთ მუშაობას და გავივლით კონსულტაციებს ჩვენი სკოლის დამფუძნებლებთან,“- გვეუბნება დირექტორი.

შაჰინის სკოლას ავტორიზაციის საბჭომ ავტორიზაცია 2017 წლის 3 თებერვალს გაუუქმა. ავტორიზაციის საბჭოს განცხადებით, სკოლაში დარღვეული იყო მოსწავლეთა ჩარიცხვის წესი, რასაც არ იზიარებს სკოლის ადმინისტრაცია და ამბობს, რომ სკოლის დახურვის მოტივი პოლიტიკურია.

შაჰინის სკოლა-ლიცეუმის დახურვის ფაქტს, არასამთავრობო ორგანიზაცია „ტოლერანტობისა და მრავალფეროვნების ინსტიტუტი“ გამოეხმაურა.

შაჰინის სკოლაში 350 მოსწავლე სწავლობდა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com