Batumelebi | სოციალურად დაუცველების გამაფრთხილებელი აქცია ბათუმში სოციალურად დაუცველების გამაფრთხილებელი აქცია ბათუმში – Batumelebi

სოციალურად დაუცველების გამაფრთხილებელი აქცია ბათუმში

 

 

მთავრობის სახლთან აქცია მიმდინარეობს. მასში სოციალურად დაუცველები იპოთეკით დაზარალებულები, უსახლკაროდ დარჩენილები, ხელვაჩაურში,  ე. წ.  25-ე და 53 ბატალიონის ტერიტორიაზე მცხოვრები მოსახლეობა მონაწილეობს. თითოეული ჯგუფი ხელისუფლებისგან მათი პრობლემების მოგვარებას მოითხოვს. მათ  ასევე შეუერთდნენ ეკომიგრანტები და საგზაო მშენებლობით დაზარალებული საჩინოს მოსახლეობა. 

იპოთეკით დაზარალებულები ამბობენ, რომ მათ ახალი ხელისუფლება, პირადად ბიძინა ივანიშვილმიც კი შეპირდათ დაბალპროცენტიანი სესხებით დახმარებას.

„საპარლამენტო არჩევნების მერე იპოთეკით დაზარალებულები ქუჩაში ვართ. ახლად არჩეული ხელისუფლება გვპირდებოდა პრობლემის მოგვარებას. გვიჭირდა, ამიტომ შევაჩერეთ პროცენტების შეტანა. პროცენტი პროცენტს ემატებოდა, ვერ გადავიხადეთ და დავრჩით უსახლკაროდ. ნუთუ ამდენ ლტოლვილებსა და უსახლკაროებს ჩვენი უსახლკარობაც უნდა დაემატოს. ახლა უკვე არჩევნები მოდის და ვიცით ვის უნდა მივცეთ ხმა,“ – ამბობს აქციაზე მყოფი ერთ-ერთი კერძო იპოთეკით დაზარალებული ვარდო თურმანიძე.

აქცია დღის 4 საათზე მერიასთან უფლებადამცველ თამაზ ბაკურიძის ხელმძღვანელობით დაიწყო. იქ შეკრებილებმა ხელვაჩაურში თვითნებურად შესახლებულებისთვის დენის მიწოდება და სანიტარიული მდგომარეობის მოწესრიგება მოითხოვეს.

„არა გვაქვს შუქი. მეორე ზამთარი მოდის რაც სიცივესა და ანტისანიტარიაში ვიმყოფებით. შუქს არ გვირთავენ, თვითნებურად შესახლებულები ხართო. 11 წლის ბავშვი მყავს, ქმარი კი ციხეშია,“ – გვიყვება ხელვაჩაურში მცხოვრები ზეინაბ გურგენიძე.

აქციამ მსვლელობით ილია ჭავჭავაძის ძეგლთან, შემდეგ კი აჭარის მთავრობის სახლთან გადაინაცვლა. აქციის მონაწილეები ქუჩებში სკანდირებდნენ: „გაუმარჯოს სოციალური სამართლიანობის აღდგენას“ და ხელში დაჭერილ ალუმინის ქვაბებსა და კოვზებს ახმაურებდნენ.

აქციის ერთ-ერთი ორგანიზატორი თამაზ ბაკურიძე აღნიშნავს, რომ ეს აქცია ჯერ კიდევ აგვისტოში დაანონსეს, როცა განაცხადეს, რომ თუკი ხელისუფლება ამ ადამიანების სოციალურ პრობლემებს არ მოაგვარებდა სექტემბრიდან დაიწყებდნენ მასშტაბურ გამოსვლებს:

„ეს გამაფრთხილებელი აქციაა, იმ დიდი აქციებისა, რომელსაც ჩვენ ვიწყებთ სოციალური სამართლიანობის აღდგენის მიზნით. თუ ხელისუფლება დანაპირებს არ შეასრულებს და ხალხის პრობლემებს არ მიხედავს, ხალხი მოიყვანს იმ ხელისუფლებას, რომელიც იზრუნებს ხალხზე,“ – აცხადებს თამაზ ბაკურიძე.

აქციის მონაწილეები ამბობენ, რომ მანამდე არ გაჩერდებიან, სანამ სოციალურ სამართლიანობას არ მიაღწევენ. მათივე თქმით 29 სექტემბერს ისინი კვლავ მოაწყობენ საპროტესტო მიტინგს.

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი