„მთავრობის აპარატის უფროსსა და აჭარის განათლების მინისტრს, ინგა შამილიშვილს შევხვდით. შევთანხმდით, რომ სამართლებრივად, სასამართლოს გზით გადაწყდება ეს ყველაფერი. ისინი ამბობენ, რომ მთავრობა ვერ ჩაერევა ამ საკითხის გადაწყვეტაში, თუმცა შევთანხმდით, ჩვენთან ექნებათ კომუნიკაცია,“-გვეუბნება საპროტესტო აქციაში მონაწილე ერთ-ერთი მშობელი, შორენა აბულაძე.
კიდევ ერთი მშობელი, რომელიც მინისტრთან შეხვედრაზე იმყოფებოდა, ირაკლი ბერიძეა. როგორც იგი ამბობს, აჭარის მთავრობიდან ნაწილობრივ მხარდაჭერას გრძნობს.
„ამ შეხვედრიდან ის აზრი გამოვიტანე, რომ მთავრობიდან მხოლოდ ნაწილობრივ მხარდაჭერას ვგრძნობთ. რაც გამოიხატება იმაში, რომ საჭიროა ამ საკითხში ბოლომდე გარკვევა და ვთხოვეთ ავტორიზაციის საბჭოსთან შუამდგომლობა. იქნებ რამენაირად მოხდეს გადაწყვეტილების გადახედვა,“- ირაკლი ბერიძე.
მშობლები მთავრობის გარდა საზოგადოებრივი ორგანიზაციების მხარდაჭერასაც ითხოვენ.
„ჩვენ ვიცავთ მხოლოდ ჩვენი შვილების ინტერესებს, დანარჩენს სკოლა და სასამართლო გაარკვევს ერთმანეთში“.
შაჰინის სკოლა-ლიცეუმს ავტორიზაციის საბჭომ ფუნქციონირება 3 თებერვალს შეუჩერა.