Batumelebi | ბათუმის ბულვარში მოხუცები საკუთარი ხელით შექმნილ ნივთებს ყიდიან ბათუმის ბულვარში მოხუცები საკუთარი ხელით შექმნილ ნივთებს ყიდიან – Batumelebi
RU | GE  

ბათუმის ბულვარში მოხუცები საკუთარი ხელით შექმნილ ნივთებს ყიდიან

 

სამკაულები, ნაჭრის ჩანთები, ბავშვის წინდები, ნაქსოვი შარფები, ხელოვნური ყვავილები, ნაქარგები და  კიდევ სხვა რამდენიმე სახეობის ნივთი, რომლებიც ხანდაზმულებმა საკუთარი ხელით შექმნეს, ბათუმის ბულვარის ცენტრალურ შესასვლელში საგანგებოდ მომზადებულ დახლზე აწყვია. გამოფენა – გაყიდვას ბათუმის ხანდაზმულთა ცენტრის ბენეფიცარები მასპინძლობენ. აქცია მათი მხარდაჭერის მიზნით „წითელი ჯვრის“ საერთაშორისო ორგანიზაციის ბათუმის ფილიალმა დაგეგმა. 

გამოფენა-გაყიდვა დღის 4 საათზე დაიწყო. ექვსი საათისთვის ხანდაზმულებს საერთო ყულაბაში ოთხმოცდაათი ლარი აქვთ და გასაყიდი კიდევ ბევრი დარჩათ. ცოტა ხნის წინ მათ მსგავსი აქცია ბათუმის „შერატონში“ მოაწყვეს სადაც უფრო მეტი ნივთი გაყიდეს და შესაბამისად მეტი თანხაც შეაგროვეს. ამჯერად მათთან ერთად „წითელი ჯვრის“ აჭარის ორგანიზაციის მოხალისეები და ორგანიზაციის ხელმძღვანელებიც არიან.

„ჩვენი ორგანიზაცია ცდილობს გვერდში დაუდგეს ხანსაზმულებს. მოქმედი ხანდაზმულთა ცენტრების დახმარებით ისინი სხვადასხვა ჯგუფებში გვყავს ჩართული, ეს იქნება კერვა, სხვადასხვა ნივთების დამზადება თუ სხვა რამ. მათ ასწავლიან კიდევაც და შემდეგ ეხმარებიან საკუთარი ნამუშევრები გასაყიდად გაიტანონ. “ – ამბობს ნათია ლოლაძე საქართველოს წითელი ჯვრის საზოგადოების პრეზიდენტი, რომელიც ბულვარში დაგეგმილ აქციაში იღებს მონაწილეობას.

აქცია ბათუმის ბულვარში

წითელი ჯვრის მიერ დაარსებული ხანდაზმულთა ცენტრი ბათუმში ორი წელია რაც მოქმედებს და დღემდე ის სამასამდე ბენეფიციარს აერთიანებს.  ორგანიზაციის ბათუმის ფილიალის ხელმძღვანელის ოთარ დავითაძის თქმით ცენტრში ყველა პირობაა ხანდაზმულთა შეკრებისა და მათი საზოგადოებრივ საქმიანობაში ინტეგრაციისთვის:

„კრიტერიუმები განსაზღვრული არ გვაქვს, თუმცა ჩვენი  ბენეფიციარებიდან უმეტესობა მაინც სოციალურად დაუცველია, ხშირ შემთხვევაში ისინი თავს მიტოვებულად გრძნობენ. ჩვენ მათ ყველა პირობას ვუქმნით იმისათვის, რომ თავი საჭიროდ იგრძნონ. ცენტრში ისინი ერთმანეთს უმეგობრდებიან და  დაბადების დღეებსაც კი იხდიან. სპეციალურად მათთვის იგეგმება სხვადასხვა ხასიათის ღონისძიებებიც, ისინი ამით საზოგადოებრივ ცხოვრებაში ერთვებიან.

შემიძლია მოგიყვეთ ერთ მაგალითზე რაც ვფიქრობ ამ პროექტის მნიშვნელობას უკეთ დაგანახებთ. გადმოგვცეს, რომ ლერმონტოვის ქუჩაზე ცხოვრობდა ხანდაზმული ქალბატონი, რომლის შვილმაც თავი მოიკლა. ამ ფაქტის შემდეგ ის ფატობრივად ჩაკეტილ სივრცეში ცხოვრობდა. ჩვენმა პროქტმა მოგვცა საშუალება, რომ მასთან ფსიქოლოგებს ემუშავათ, რამაც კარგი შედეგი მოგვცა. ახლა ის ჩვენი ცენტრის ერთ-ერთი ბენეფიციარი და ხშირი სტუმარია.“

გამოფენა გაყიდვიდან შემოსული თანხა ბენეფიციარებს რჩებათ. ნათია ლოლაშვილის ინფორმაციით ორგანიზაცია აჭარაში კიდევ ორი მსგავსი ცენტრის გახსნას გეგმავს.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე