Batumelebi | დანაგვიანებული ზღვა კვარიათში დანაგვიანებული ზღვა კვარიათში – Batumelebi
RU | GE  

დანაგვიანებული ზღვა კვარიათში

 

კვარიათში, იქ სადაც ზღვა ყურეს ქმნის, ზღვაში  ნაგავი ყრია. საყოფაცხოვრებო ნარჩენებით დაბინძურებული ზღვა დამსვენებლებს დისკომფორტს უქმნის. აჭარის გარემოს დაცვის სააგენტომ ზღვის დაბინძურების ფაქტზე მოკვლევა უკვე დაიწყო.

„გუშინ დილიდან გონიოს მხრიდან მოდიოდა ნაგავი. რადგან ყურეა, აქ გროვდება. ჩვეულებრივი საყოფაცხოვრებო ნაგავია. ეს არ არის არც თურქეთიდან, არც გემიდან. შარშანწინ იყო სწორედ ასეთი შემთხვევა. აქ ვისვენებდი,  გამოვიძახე პატრული, ჩაუსაფრდნენ. მერე გვითხრეს, რომ ერთ-ერთი სასტუმრო ყრიდა ნაგავს. შარშან არ ყოფილა. წელს ისევ დაიწყო. ყოველდღე დილის რვა საათზე ვარ აქ და ვხედავ, როგორ მოდის გონიოს მხრიდან ნარჩენები,“ – ამბობს ირა ჭელიძე, რომელიც კვარიათში ისვენებს.

გარემოსდაცვითი  ზედამხედველობის დეპარტამენტის აჭარის სამსახურის  ხელმძღვანელის მამუკა ჩანტლაძის განცხადებით, მათი სამსახური უკვე ინფორმირებულია მომხდარ ფაქტთან დაკავშირებით და მოკვლევას აწარმოებს.

„გასულები არიან ჩემი თანამშრომლები. გაარკვევენ ყველაფერს და შესაბამის ზომებს მივიღებთ,“ – განაცხადა მამუკა ჩანტლაძემ „ბათუმელებთან“ საუბარში.

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი