Batumelebi | სწავლა საზღვარგარეთ სტუდენტებისთვის და არა მხოლოდ სწავლა საზღვარგარეთ სტუდენტებისთვის და არა მხოლოდ – Batumelebi
RU | GE  

სწავლა საზღვარგარეთ სტუდენტებისთვის და არა მხოლოდ

 

ბათუმის შოთა რუსთაველის უნივერსიტეტის ოცდაათზე მეტი სტუდენტი გაცვლითი პროგრამით ევროპის სხვადასხვა უნივერსიტეტში სწავლობს. უნივერსიტეტიდან უცხოეთში წასვლა „ტემპუსისა“ და „ერაზმუს მუნდუსის“ გაცვლითი პროგრამით შეიძლება.  პროგრამაში გამარჯვების წინაპირობა უცხო ენის ცოდნა და მაღალი აკადემიური მოსწრებაა.


 

წელს, სექტემბერში, „ერასმუზ მენდუსის“ პროგრამით ბათუმის შოთა რუსთაველის უნივერსიტეტის ოთხი სტუდენტი წავა უცხოეთში სასწავლებლად რამდენიმე თვით. მირანდა ცინცქილაძე ტურიზმს ადამ მიცკევიჩის უნივერსიტეტში, პოლონეთში ისწავლის; ქეთევან დევაძე სოციალურ მეცნიერების, ბიზნესისა და სამშენებლო ფაკულტეტზე ბელგიაში, გენტის უნივერსიტეტში; ზურაბ მესხიძე ტორინოს პოლიტექნიკურ უნივერსიტეტში, იტალიაში; გულად ფარტენაძე კი ჰელსინკში, აალტოს უნივერსიტეტში, ფინეთში ისწავლის.  „ერასმუს მუნდუსის“ პროგრამითვე ბათუმის შოთა რუსთაველის უნივერსიტეტიდან დოქტორანტურის შემდგომი სწავლისათვის ესპანეთში, ვალენსიის პოლიტექნიკურ უნივერსიტეტში მიემგზავრება ანა თენიეშვილიც.

 

ლელა თურმანიძე, ბსუ-ს ბიბლიოთეკის დირექტორი, რომელიც აღნიშნული პროგრამების კოორდინატორია, ამბობს, რომ ბოლო სამი წლის აქტივობის შედეგად უნივერსიტეტი „ტემპუსის“ 11 პროგრამაშია ჩართული: „ტემპუსის პროგრამით ძირითადად პროფესურის გაცვლა ხდება, გამოცდილების გასაზიარებლად, „ერაზმუს მუნდუსის“ პროგრამა კი უშუალოდ სტუდენტთა გაცვლაზეა ორიენტირებული“.

 

პროგრამების კოორდინატორის თქმით, თანამშრომლობის შედეგად, პარტნიორი უნივერსიტეტის სტუდენტებს, როგორიცაა ბათუმის შოთა რუსთაველის სახელმწიფო უნივერსიტეტი, მეტი უპირატესობა ეძლევათ. 

 

„ერაზმუს მუნდუსის“ გაცვლით პროგრამას სამი სამიზნე ჯგუფი ჰყავს. პირველ ჯგუფში შედიან: სტუდენტები (ბაკალავრიატი, სამაგისტრო, დოქტორანტურა), პოსტ-დოქტურანტურის მკვლევარები და აკადემიური პერსონალი, რომლებიც დარეგისტრირებულნი არიან პარტნიორ უნივერსიტეტებში; მეორე ჯგუფში შედიან საქართველოს მოქალაქეები, რომლებსაც აქვთ საუნივერსიტეტო ხარისხი ან მისი ექვივალენტი იმ უმაღლეს საგანმანათლებლო დაწესებულებებში (მაგისტრი,  დოქტორანტი, პოსტ-დოქტორანტი). ეს გულისხმობს მობილობის შესაძლებლობას მათთვის, ვინც სახელმწიფო მმართველობის სფეროში, კერძო და საჯარო სექტორში მუშაობენ; მესამე ჯგუფში კი შედიან მაგისტრები, დოქტორანტები და პოსტ-დოქტორანტები, რომლებიც მძიმე სოციალურ მდგომარეობაში იმყოფებიან, აქვთ ლტოლვილის სტატუსი ან სარგებლობენ თავშესაფრის უფლებით, ან თუ დადასტურდება, რომ ისინი უსაფუძვლოდ იქნენ გარიცხული უნივერსიტეტიდან რასობრივ, ეთნიკურ, რელიგიურ, პოლიტიკურ, გენდერულ ნიადაგზე.

 

„ერაზმუს მუნდუსის“ გაცვლითი პროგრამით ვახო ნაკაშიძე უკვე რვა თვეა გერმანიაში, George-August-ის უნივერსიტეტში სწავლობს. „ერასმუს მუნდუსის შესახებ უნივერსიტეტში გავიგე. გაცვლითი პროგრამების მიმართ გულგრილი ვიყავი, მეგონა, რომ ჩაწყობით ხდებოდა საზღვარგარეთ წასვლა, ისე ვცადე, ნამდვილად არ ველოდი, რომ მოვხვდებოდი პროექტში“, – ამბობს ვახო. იგი ორ თვეში უკან დაბრუნდება, მისი თქმით საზღვარგარეთ სწავლა ცხოვრებისეული გამოცდილების მისაღებადაც საჭიროა: – „სწავლის ხარისხი რა თქმა უნდა მაღალია გერმანიაში, მაგრამ საჭირო განათლების მიღება ბსუ-შიც შესაძლებელია. საზღვარგარეთ წასვლით ადამიანებთან ურთიერთობას სწავლობ, უცხო ენას იუმჯობესებ. მე ორ ენაზე მიწევს სწავლა, გერმანულად და ინგლისურად“, – ამბობს ვახო.

 

ერთი თვის წინ დაბრუნდა გერმანიიდან თეა შავაძე. ქალაქ გიოტინგენში ის ექვსი თვე სწავლობდა, იგი სტიპენდიის სახით თვეში 1000 ევროს იღებდა და როგორც თეა ამბობს, ეს თანხა სრულიად საკმარისია გერმანიაში საცხოვრებლად: „დიდი გამოცდილება შევიძინე, მცირე დროში მივიღე ის განათლება, რომლის მიღებას აქ დიდი დრო სჭირდება. სწავლის დონე საქართველოსა და გერმანიას შორის განსხვავდება, იმიტომ, რომ გერმანიაში მეტი დაფინანსებაა განათლებისთვის, შესაბამისად ხარისხიც მაღალია“.

 

„ერაზმუს მენდუსის” პროგრამა ანაზღაურებს სტუდენტის მგზავრობის, დაზღვევისა და სტიპენდიის ხარჯებს.

 

სექტემბრიდან ბათუმის უნივერსიტეტში ახალი თურქული პროგრამა „მევლანა“ ამოქმედდება. ამ პროგრამაში პროექტში გამარჯვებული სტუდენტები თურქეთის წამყვან უნივერსიტეტში გააგრძელებენ სწავლას, პროგრამის მთავარი პირობა ინგლისური ენის ცოდნა და მაღალი აკადემიური მოსწრებაა. თითქმის იდენტური მოთხოვნებია სხვა პროგრამებზე მოსახვედრადაც:

 

„სააპლიკაციო ფორმების შევსება ძირითადად ონლაინრეჟიმში ხდება, თუმცა არის პროგრამები, რომლებიც ტესტირებას და გასაუბრებასაც ითვალისწინებს. გაცვლითი პროგრამების გარდა სახელშეკრულებო პროგრამებიც ფუნქციონირებს ჩვენთან, საზაფხულო სკოლები იხსნება. კიდევ არის სამთავრობო სტიპენდიები, რომლებიც გასვლას გულისხმობს: იაპონიაში, რუმინეთში, საფრანგეთში, ჩეხეთში, თურქეთში და ა.შ. ტურიზმის ფაკულტეტს აქვს ნორვეგიის უნივერსიტეტთან გაფორმებული ხელშეკრულება, წელიწადში ხუთ სტუდენტს მაინც უშვებს სასწავლებლად“, – ამბობს ბსუ-ს საგარეო საქმეთა დეპარტამენტის ხელმძღვანელი თამარ მაჭუტაძე. 

 

გაცვლითი პროგრამების შესახებ ინფორმაციას უნივერსიტეტის ვებგვერდზე – bsu.edu.ge – ნახავთ. პროგრამები სექტემბერში განახლდება და მსურველებსაც მაშინ შეეძლებათ მოსინჯონ საკუთარი შესაძლებლობები. 

ნეტგაზეთის მასალების სხვა გამოცემებში გადაბეჭდვის წესი
ქეთი ლაბაძე