Batumelebi | ხელისუფლება და იმედგაცრუებული ფერმერები ხელისუფლება და იმედგაცრუებული ფერმერები – Batumelebi
RU | GE  

ხელისუფლება და იმედგაცრუებული ფერმერები

 

 

დღეს აჭარის მთავრობის თავმჯდომარემ არჩილ ხაბაძემ და სოფლის მეურნეობის მინისტრმა ზაურ ფუტკარაძემ ბათუმის რუსთაველის უნივერსიტეტის დარბაზში,  აგროსესხებთან დაკავშირებით ფერმერებთან დისკუსია გამართეს.

 

ყველაზე მეტი კითხვა დამწყები ფერმერების მხრიდან დაისვა. მათ  აინტერესებთან როგორი იყო ხელისუფლების და ბანკების პოლიტიკა მათ მიმართ, თუმცა, როგორც  არჩილ ხაბაძემ, ასევე კომერციული ბანკების წარმომადგენლებმა განაცხადეს, რომ ამ ეტაპზე ვერც სახელმწიფო და ვერც ბანკი დამწყებ ბიზნესს ვერ დააფინანსებს.

 

 კითხვები დაისვა სოფლის მეურნეობის სუბსიდირებასთან დაკავშირებითაც. ფერმერების ნაწილი ამბობდა რომ მათ ხელისუფლებისგან სხვა მოლოდინები ჰქონდათ

 

„მინდა მეცხოველეობის ფერმა გავაკეთო, მაგრამ დაფინანსებაზე ბანკები უარს მეუბნებიან. არც სახელმწიფოს აქვს ჩვენთვის დახმარება. მე იმედი მაქვს ბიძინა ივანიშვილის, რადგან ის ბიზნესმენია და იცის, რომ თუ ბიზნესი არ დაიწყე, ვერ განავითარე“-ამბობს ხელვაჩაურში მცხოვრები ანზორ ფასანიძე.

დამწყები ფერმერის თქმით ბანკებს მოძველებული მენტალიტეტი აქვთ: „იმედია ეს დამოკიდებულება შეიცვლება“.

„საქართველოს ბანკის“ წარმომადგენელის ბიძინა სიხარულიძის განცხადებით, თუ ფერმერის თანამონაწილეობა არ არის ბიზნესში, ისე ბანკი სესხს ვერ გასცემს, რადგან რისკები ძალიან დიდია. „სახელმწიფოს მხრიდან საუბარია მხოლოდ ოცდაათპროცენტიან გარანტიაზე, თუმცა ხელისუფლება ამ საკითხზეც ბოლომდე არ არის ჩამოყალიბებული“.

დამწყები ბიზნესის დაფინანსებაში რისკებს ხედავს „პროკრედიტ ბანკის“ წარმომადგენელიც. „თუმცა თანადაფინანსების შემთხვევაში და კარგი ბიზნეს გათვლების პირობებში, არაერთი ბიზნესი დაგვიფინანსებია“.

მინისტრი ზაურ ფუტკარაძეც იგივე აზრისაა. ამბობს, რომ იმ პირებს რომლებსაც ქონება და ბიზნესის გამოცდილება არ აქვთ, ვერ დაფინანსდებიან. „თუ ადამიანს არანაირი კაპიტალი არ აქვს და ითხოვს მილიონ ლარს, ასეთი ბიზნესი ვერ დაფინანსებდა. ამისთვის არსებობს ექვსთთვიანი უპროცენტო სესხი ხუთი ათას ლარამდე, რომ ფერმერმა დაიწყოს საქმე და მიიღოს გამოცდილება. ამ შემთხვევაში საუბარია ბიზნესის გაფართოებაზე და არა დაწყებაზე“.

მინისტრის განცხადებით, დამწყებ ფერმერთა დასახმარებლად ჩართულია სავაჭრო პალატა და სოფლებში შექმნილია საკონსულტაციო სამსახურები.

არჩილ ხაბაძე კი ამბობს, შეხვედრის მიზანიც სწორედ ის იყო, რომ გამოკვეთილიყო მთავარი პრობლემები. „გაურკვევლობა იყო როგორც ბანკების ასევე ფერმერების მხრიდან. ჩვენ ვმუშაობთ იმაზე თუ როგორ შეიძლება ვითარების გამოსწორება. ბანკები მაღალრისკიან სესხებს სკეპტიკურად უყურებენ, თუმცა დამწყებ ფერმერთა ბიზნესწინადადებაც შეიძლება განიხილოს ბანკმა, თუ იქნება ამაში ფერმერის თანამონაწილეობა.

სახელმწიფოს ერთადერთი რითაც შეუძლია დაეხმაროს დამწყებ ფერმერს, ეს არის მიზნობრივი პროგრამები, რომლის ფარგლებშიც ფერმერებს ვამარაგებთ ბოსტნეულის ჩითილებით, ნერგებით, სკები მეფუტკრეებისთვის, ასევე სასოფლო-სამეურნეო ბარათებით ვამარაგებთ რაც დასაწყისისთვის შეუძლიათ გამოიყენონ“.

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე