Batumelebi | პილოტირებული ჯგუფები საუკეთესო სტუდენტებისათვის პილოტირებული ჯგუფები საუკეთესო სტუდენტებისათვის – Batumelebi
RU | GE  

პილოტირებული ჯგუფები საუკეთესო სტუდენტებისათვის

 

შოთა რუსთაველის უნივერსიტეტში მაღალი აკადემიური მოსწრების მქონე სტუდენტებისათვის პილოტირებული ჯგუფები გაიხსნება. სტუდენტებს ამ ჯგუფში თავად შეეძლებათ ლექტორის არჩევა. უნივერსიტეტის რექტორი, ალეკო ბაკურიძე სტუდენტებს დაჰპირდა, რომ მოთხოვნის შემთხვევაში ლექტორებს მოიწვევენ, რადგან უნივერსიტეტში პროფესორ-მასწავლებლების საკმარისი რაოდენობა არ არის და სტუდენტებს ამ მხრივ დიდი არჩევანი არ ექნებათ.  

სტუდენტთა მომსახურებისა და მხარდაჭერის ცენტრის ხელმძღვანელი რეზო ოკუჯავა ამბობს, რომ ეს იდეა უნივერსიტეტში მომწიფდა: „ვფიქრობთ, რომ ყველაზე რეიტინგულ მიმართულებებზე: ფინანსებზე, სამართალსა და ინგლისურებზე, შევქმნათ პილოტირებული ჯგუფები. ამ სემესტრში დავაკვირდებით ამ ჯგუფებს და შემდეგ დავნერგავთ დანარჩენ მიმართულებებზე. პირველი 25 სტუდენტი GPA რეიტინგით შეირჩევა, მათ ექნებათ ცალკე სალექციო და სასემინარო ჯგუფი. ყველა სტუდენტი უნდა ცდილობდეს ამ ჯგუფში მოხვედრას, კონკურენტული გარემო უნდა იყოს, რადგან მათ მიეცემათ საშუალება, თავად შეარჩიონ ლექტორები.

 

გამოცხადდება კონკურსი, კონკურსანტი ლექტორები წაუკითხავენ ამ სტუდენტებს ლექციას და რომელსაც სტუდენტები აირჩევენ, ის ლექტორი დარჩება. ამ სტუდენტებს გვინდა შევთავაზოთ ყველა ის, ასე ვთქვათ, ნოუ-ჰაუ, რაც აპრობირებულია პრესტიჟულ უნივერსიტეტებში. ვფიქრობ, ამ სტუდენტების 90 პროცენტს გაუჩნდება სურვილი, გააგრძელოს სწავლა და დოქტორის ხარისხიც მიიღოს. ჩვენ რომ ვსაუბრობთ არ გვყავს საკმარისი რაოდენობის ლექტორები, საჭირო ხომ არის კადრი გაიზარდოს? მაგალითად, სამართალზე არის პრობლემა, საკონსტიტუციო სამართალი ბაკალავრიატში გვაქვს, მაგრამ სტუდენტს თუ მაგისტრატურაზე უნდა ამ საგნის სწავლა, სხვა უნივერსიტეტში უნდა წავიდეს, რადგან ჩვენთან არ ისწავლება, პროფესორ-მასწავლებლების არ არსებობის გამო.“ – განმარტავს რეზო ოკუჯავა.

 

 

 

 

ნეტგაზეთის მასალების სხვა გამოცემებში გადაბეჭდვის წესი
ქეთი ლაბაძე