Batumelebi | მინისტრი გადადგომას აპირებს? მინისტრი გადადგომას აპირებს? – Batumelebi
RU | GE  

მინისტრი გადადგომას აპირებს?

გავრცელებულ ინფორმაციას იმის შესახებ, რომ აჭარის ფინანსთა და ეკონომიკის მინისტრმა გიორგი თავართქილაძემ მთავრობის თავმჯდომარეს გადადგომის თხოვნით ოფიციალურად მიმართა, აჭარის მთავრობაში არ ადასტურებენ.

„ვერ დაგიდასტურებთ, დღეს კანცელარია არ მუშაობს, თანამშრომელთან დაკავშირება კი ვერ მოვახერხე.“- განაცხადა მთავრობის პრესსამსახურის უფროსმა ნათია სირაბიძემ, გუშინ 17 თებერვალს, „ბათუმელებთან“ საუბარში.

 

თავად მინისტრის, გიორგი თავართქილაძის, მობილურ ტელეფონს კი თანაშემწემ, იური ფენმა უპასუხა: „მინისტრი მივლინებაშია და ვერ გიპასუხებთ, მე კი შემიძლია გითხრათ, რომ გავრცელებული ინფორმაცია იმის შესახებ, თითქოს მინისტრმა განცხადება დაწერა გადადგომაზე, სიმართლეს არ შეესაბამება.“

მინისტრის შესაძლო გადაყენების შესახებ გავრცელებულ ინფორმაციას საზოგადოებაში მის მიერვე გაჟღერებულ 40 მილიარდიან ინვესტიციასთან დაკავშირებულ განცხადებას უკავშირებენ. მინისტრის ამ განცხადებას გასულ ორშაბათს უმაღლესი საბჭოს უმცირესობის წევრი ეკატერინე თარგამაძე სპეციალური ბრიფინგით გამოეხმაურა და უმაღლესი საბჭოს „ნაციონალური მოძრაობის“ ფრაქციის სახელით გიორგი თავართქილაძისგან გავრცელებული ინფორმაციის შესახებ მეტი დაკონკრეტება ითხოვა.

 

აჭარაში 40 მილიარდი დოლარის ინვესტიციის შემოსვლის შესახებ აჭარის ფინანსთა და ეკონომიკის მინისტრმა სამინისტროში გამართულ ბრიფინგზე განაცხადა. მინისტრის თქმით, „ყოველი ახალი ინვესტიცია, რეგიონის ეკონომიკური განვითარების თავისებურებებსა და სპეციფიკაზე იქნება მორგებული, ამის საშუალებას კი აჭარის სივრცითი მოწყობის პროექტი ქმნის. აღნიშნული დოკუმენტი აჭარის გრძელვადიანი განვითარების განსაზღვრის საშუალებას, სექტორების მიხედვით იძლევა. 

 

ტრადიციები, გეოგრაფიული და ლანდშაფტური მახასიათებლები, თავად აჩენენ ინვესტიციების მოზიდვის პერსპექტივას, თუმცა, მთავარია, კაპიტალდაბანდებებს სწორი მიმართულება მიეცეს. რეგიონში მალე წარმოდგენილი იქნება გაცილებით მეტი დაინტერესებული ქვეყნის ბიზნესწრეები, ვიდრე აქამდე იყო, ეს კი საუკეთესო საშუალება იქნება აჭარის მრავალმხრივი განვითარებისთვის.“

 

რა კაპიტალდაბანდებებსა და კონკრეტულად რა პროექტების დაფინანსებაზე საუბრობდა მინისტრი, ამის შესახებ დაზუსტებული ინფორმაციის მოსასმენად უმაღლესი საბჭოს უმცირესობის ფრაქცია გიორგი თავართქილაძეს სხდომაზე ამ დღეებში მიიწვევს.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე, "ბათუმელები"