მინისტრმა გია თავამაიშვილმა შეხვედრაზე ერთ-ერთი კერძო კომპანია შპს „MAN PROJECT ARCHITECTURE“ -იდან შესული განცხადებაც გაასაჯაროვა, რომლის მიხედვითაც კომპანია სამინისტროს მუზეუმის იჯარით გადაცემას სთხოვს, სანაცვლოდ კი მის მოვლა პატრონობას თავის თავზე აიღებს.
„ჯერ არაფერზე არ ვართ ბოლომდე შეთანხმებული. ჩვენ გვინდა გავიგოთ რას იტყვიან ისინი ვისაც უნდა ქირაობა. იმიტომ რომ ჩვენ რომ ეს განვავითაროთ, ამის თანხა არ გვაქვს. მუზეუმი არის სანახევროდ გაკეთებული. ისევ ჩვენ რომ შევუკვეთოთ ცვილის ფიგურების გაკეთება ძალიან დიდ თანხაზე ავა. ამჯერად შევთანხმდით იმაზე რომ დავფიქრდეთ, სხვისი აზრიც მოვისმინოთ და მერე შეიძლება შევთანხმდეთ იმაზე, რომ ვთქვათ მივცეთ იჯარით მსურველ კომპანიას,“ – განაცხადა შეხვედრის დასრულების შემდეგ კულტურული მემკვიდრეობის სააგენტოს ხელმძღვანელმა ბიძინა აფხაზავამ.
ბათუმში მაზნიაშვილის ქუჩაზე მდებარე შენობის რეაბილიტაცია აჭარის კულტურული მემკვიდრეობის სააგენტოს მიერ 2011-2012 წელს განხორცილდა. გასული წლის ოქტომბერში რეაბილიტირებულ შენობაშის ცვილის ფიგურების მუზეუმი გაიხსნა. ისტორიული წყაროების თანახმად იგი თავდაპირველად ეკუთვნოდა თამბაქოს მსხვილ ფაბრიკანტს წარმოშობით ბერძენ კომერსანტ ლაზარე ბინიათ-ოღლის.
,,ბათუმის ცვილის ფიგურების მუზეუმში’’ დღეისათვის 16 ცვილის ქანდაკებაა განთავსებული. მათ შორის: მედეა და იასონი, ზეზვა და მზია, ასლან აბაშიძე, მევლუდ დიასამიძე, ლაო ჯინჯაო და მეჩაიე ქალი, თანამედროვე მშენებელი, ალფრედ ნობელი, გენერალი ნეტკაჩოვი, რომაელი ჯარისკაცი, ორი არგონავტი და ტურისტი. ასევე ამ შენობის თავდაპირველი მეპატრონის ლაზარე ბინიათ-ოღლისბინიათ-ოღლის სკულპტურა.
„ბათუმის ცვილის ფიგურების მუზეუმის’’ რეაბილიტაციისათვის აჭარის ბიუჯეტიდან კულტურული მემკვიდრეობის სააგენტოს „მუზეუმების მშენებლობა რეაბილიტაციის“ მიზნობრივი პროგრამის ფარგლებში მილიონ ლარზე მეტი დაიხარჯა. მათ შორის შენობის რეაბილიტაციისათვის – 704, 900 ლარი, ცვილის ფიგურების დასამზადებლად – 290 400 ლარი, დეკორაციებისთვის – 219 382 ლარი.
ბათუმის ცვილის მუზეუმი ვიზიტორებისათვის ამ პერიოდში დახურულია.
