მესამე წელია ხულო-თაგოს საბაგირო გზა გაჩერებულია და მოსახლეობას ერთადერთი საავტომობილო, შემოვლითი გზით უწევს სარგებლობა.
ამ სამი წლის განმავლობაში აჭარის მთავრობამ არათუ ტენდერი ვერ გამოაცხადა აღდგენა-რეაბილიტაციის პროექტისა და შესაბამისი სამუშაოების შესყიდვის მიზნით, არამედ ჯერ საპროექტო წინადადებაც კი არ აქვს მზად.
ადგილობრივები „ბათუმელებთან“ ამბობენ, რომ საბაგიროს გაჩერებამ და პრობლემურმა სამანქანო გზამ ხელი შეუწყო სოფლიდან მიგრაციის პროცესის დაჩქარებას, შედეგად კი სკოლა დაიცალა და მიმდინარე [2026-27] სასწავლო წლის დასაწყისში თაგოს სკოლას არც ერთი მოსწავლე არ ჰყავს.
„დიახ დაიცალა სკოლა, ხალხი გარბის, სოფლები იცლება, შემოვლითი გზა არ არის მარტივი გზა, მსუბუქ მანქანებს უჭირთ გადაადგილება, ჯიპი გინდა იქ. ტაქსით, რომ ისარგებლო ძალიან ძვირია, სწორედ ამ ცუდი გზის გამო და საბაგიროს გაჩერების გამო მოხდა ეს“ – ამბობს ხულოს საკრებულოს წევრი „ლელოდან“, რომან ქედელიძე „ბათუმელებთან“.
გასული წლის ბოლოს აჭარის მთავრობა ხულო-თაგოს საბაგირო გზის რეაბილიტაციასთან დაკავშირებით წერდა, რომ წინასაპროექტო კვლევისათვის საჭირო დოკუმენტაცია შეიმუშავა და უახლოეს მომავალში ბაზრის კვლევას დაიწყებდა, შემდეგ კი ტენდერს გამოაცხადებდა პროექტის შედგენასა და შესაბამისი სამუშაოების შესრულების მიზნით.
„შემუშავდა ხულო-თაგოს საბაგირო გზის რეაბილიტაცია/რეკონსტრუქციის წინასაპროექტო კვლევისათვის საჭირო დოკუმენტაცია. სამშენებლო ობიექტის სპეციფიკიდან გამომდინარე სამუშაოების შემსრულებელი პოტენციური კონტრაქტორის შერჩევა რთულად წარიმართა, ვინაიდან ადგილობრივი ბაზარი მსგავსი ობიექტების მიწოდებით ფაქტობრივად არაა დაფარული. აღნიშნული ობიექტი მომეტებული საფრთხის შემცველია და მნიშვნელოვანია მისი უსაფრთხოებისა და ტექნიკური გადაწყვეტილების საკითხები დამუშავდეს მაღალი სტანდარტების გათვალისწინებით“ – წერდა ფინანსთა და ეკონომიკის სამინისტრო 2025 წლის ბიუჯეტის ანგარიშში.
რა ბედი ეწია პროექტს, ამის შესახებ ინფორმაცია აჭარის 2026 წლის ბიუჯეტის ორი კვარტლის შესრულების ანგარიშში ვერ ვიპოვეთ. როგორც ჩანს მინისტრმა ედნარ ნატარიძემ არ ჩათვალა საჭიროდ ინფორმაცია მიეწოდებინა მაღალმთიან სოფელში მცხოვრები მოქალაქეებისთვის, რომლებისთვისაც ამ გზის დროულად გახსნას დიდი მნიშვნელობა ჰქონდა.
შესაბამისი კვლევის მომზადების მიზნით კი აჭარის 2026 წლის ბიუჯეტში 200 000 ლარია გათვალისწინებული.
როგორც სახელმწიფო შესყიდვების პორტალზე არსებული მონაცემებით ირკვევა, აჭარის მთავრობამ ბაზრის კვლევა რამდენჯერმე სცადა, ბოლოს – 2026 წლის ივლისში, ოღონდ არა მხოლოდ ხულო-თაგოს საბაგიროს პროექტზე, არამედ კურორტ გოდერძიზე ახალი საბაგირო ხაზის საპროექტო-სახარჯთაღრიცხვო დოკუმენტაციის მომზადებისა და ამ დოკუმენტაციის საფუძველზე სამშენებლო სამუშაოების შესრულების სახელმწიფო შესყიდვაზე.
ვებგვერდზე მითითებული ინფორმაციის თანახმად, კვლევა დასრულებულია, თუმცა მთავრობამ რა შეთავაზება და ვისგან მიიღო, ამის იდენტიფიცირება არ ხდება.
ხულოს საბაგირო 1985 წელს გაიხსნა და მას შემდეგ ფუნქციონირება არ შეუწყვეტია 2024 წლამდე. ეს საბაგირო წლების განმავლობაში დაბა ხულოსა და სოფელ თაგოს აკავშირებდა ერთმანეთთან. საბაგირო გზის სიგრძე 1720 მეტრია, სიმაღლე კი – 280 მეტრი. საბაგიროთი მგზავრობისას ხულოს ხედების დათვალიერებაა შესაძლებელი, რის გამოც ის ტურისტების დიდ ინტერესს იწვევდა.
საბაგიროს განახლება აჭარის ფინანსთა და ეკონომიკის სამინისტროს ქალაქმშენებლობითი და სივრცითი მოწყობის პროგრამის ფარგლებში იგეგმებოდა. თავდაპირველი ვერსიით ქვეპროგრამის ბიუჯეტი 1 მილიონ 368 000 ლარი იყო.
