საჯარო სკოლებში ახალი სასწავლო წელი 15 სექტემბერს განახლდება.
მოსწავლეებს, რომლებიც წელს მე-10 კლასში სწავლობენ, მომავალი, 2027 სასწავლო წლიდან უკვე მოუწევთ არჩევანის გაკეთება – ისწავლონ ე.წ. „რეპეტიტორიუმში“ და სკოლა 11-წლიანი განათლების ატესტატით დაასრულონ, თუ სწავლა გააგრძელონ მე-12 კლასში.
როგორც ბათუმის რესურსცენტრში გვეუბნებიან, ჯერჯერობით არ არსებობს ინფორმაცია იმაზე, რამდენი მოსწავლე აპირებს, მაგალითად, ბათუმში 11-წლიანი განათლების მიღებას და რამდენი აპირებს სწავლის გაგრძელებას მე-12 კლასში.
„წელს ვინც მე-11 და მე-12 კლასში სწავლობს, ისინი დაასრულებენ სკოლას ჩვეულებრივად, მაგრამ მათ, ვინც წელს მე-10 კლასში არიან, მომავალ წელს მოუწევთ არჩევანის გაკეთება. უნდა აიღონ ატესტატი და გავიდნენ სკოლიდან, ან, თუ მე-12 კლასში უნდათ სწავლის გაგრძელება, მაშინ გააგრძელებენ სწავლას“, – გვეუბნება რესურსცენტრის უფროსი გოჩა დავითაძე.
2028 სასწავლო წლისთვის საჯარო სკოლებს უკვე ორი გამოშვება ეყოლებათ, რადგან სკოლას, როგორც მე-11, ისე მე-12 კლასელები ერთდროულად დაასრულებენ.
__________________
ფოტო „ბათუმელების“ არქივიდან.