Batumelebi | არჩილ ხაბაძემ გამგებლები და მინისტრები გააფრთხილა არჩილ ხაბაძემ გამგებლები და მინისტრები გააფრთხილა – Batumelebi
RU | GE  

არჩილ ხაბაძემ გამგებლები და მინისტრები გააფრთხილა

ლელა დუმბაძე

 

აჭარს მთავრობის დღევანდელ სხდომაზე მთავრობის თავმჯდომარემ არჩილ ხაბაძემ მუნიციპალიტეტის გამგებლებსა და სამინისტროებს ბიუჯეტის პროექტის დაგვიანების გამო გაფრთხილება მისცა:„ზოგიერთი სამინისტრო  ვერ ახერხებს პროექტების ბიუჯეტში ჩასმას და განხილვას,  შრომის ტემპი  და კოორდინირება აკლიათ. გამგებლებს უნდა ვუთხრა საყვედური, ასევე სამინისტროებთანაც არის საჭირო კოორდინირებული მუშაობა. ამასთან დაკავშირებით მინდა ვთქვა, რომ თუკი დროულად არ იქნება ბიუჯეტი წარმოდგენილი, ამაზე შესაბამისი სამსახურები პასუხს აგებენ“.  

სხდომაზე არჩილ ხაბაძე შეეხო აჭარის ტელევიზიის სტატუსის საკითხსაც, რომელიც მისი განცხადებით, შემაფერხებელი ფაქტორია ბიუჯეტის დამტკიცების პროცესში. „როგორც ვიცი ეს საკითხი პარლამენტში ბიუროს სხდომაზე გავიდა და მიმდინარეობს კომიტეტებში განხილვა, მაგრამ სესიები 17-იდან 22 დეკემბრამდეა და შესაძლოა წელს ვერ მოესწროს ტელევიზიიის სტატუსის განხილვა. თუ ასე მოხდა, მაშინ ტელევიზიის მუშაობა რომ არ შეფერხდეს, დროებითი ბიუჯეტი უნდა დავამტკიცოთ, იანვარ-თებერვალში კი ცვლილება შევა, ან გამოსავალი უნდა ვიპოვოთ“.

 

არჩილ ხაბაძემ სხდომაზე მაღალმთიან რეგიონებში გზების პრობლემაც დააყენა. როგორც მუნიციპალიტეტების ხელმძღვანელებმა აღნიშნეს, მათ არ აქვთ შესაბამისი ტექნიკა, განსაკუთრებით ზამთარში, რომელიც გზების გაწმენდას უზრუნველყოფს. სხდომაზე დაისვა ეკომიგრანტებისა და სოციალური სახლების მშენებლობის საკითხიც.  არჩილ ხაბაძის განცხადებით, ეკომიგრანტთა მდგომარეობა არ არის შესაბამისად შესწავლილი და ჯანდაცვის სამინისტროს ამ პრობლემის მოგვარება დაავალა. „ზუსტად უნდა ვიცოდეთ რამდენ ეკომიგრანტს ესაჭიროება დახმარება. ეს ციფრები მუდმივად იცვლება, ამიტომ შეისწავლეთ და ზუსტი მონაცემი დადეთ“.

 

ჯანდაცვის მინისტრის განცხადებით, სამინისტროში ძალიან ბევრი განცხადებაა შესული სოციალურ სახლებთან დაკავშირებით. „ჩვენ იმ სოციალურ სახლებში, რომელიც მაღალმთიან რაიონებში კეთდება, მხოლოდ 39 ოჯახის დაკმაყოფილება შეგვიძლია. სამინისტროში კი სულ ცოტა 1500 განცხადებაა, რომლებიც სოციალურ სახლებში ცხოვრებას ითხოვენ“. 

 

არჩილ ხაბაძის განცხადებით, ხელისუფლება  იფიქრებს იმაზე, რომ სოციალური სახლებისთვის დაფინანსება მომავალ წელსაც გამოიყოს.

 

აჭარის მთავრობის სხდომა
აჭარის მთავრობის სხდომა

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე