დღეს, 10 დეკემბერს, 16:00 საათზე, ბათუმში სასტუმრო შერატონში სან დიეგოს სახელმწიფო უნივერსიტეტის (SDSU) დეკანი, ვიცე დეკანი და პროფესორები აჭარის რეგიონის სკოლების დირექტორებს შეხვდებიან და უნივერსიტეტის შესახებ ინფორმაციას მიაწვდიან.
შეხვედრის ფარგლებში (SDSU) საქართველოს წარმომადგენლები აჭარის რეგიონის სკოლების დირექტორებს ყველა იმ შესაძლებლობას გააცნობენ, რაც მათი სკოლების დამამთავრებელი კლასების მოსწავლეებისთვის სან დიეგოს სახელმწიფო უნივერსიტეტი საქართველოში არსებობს. ამერიკელი მეცნიერების ბათუმში ვიზიტის მიზანია საინჟინრო, ტექნოლოგიური და საბუნებისმეტყველო (STEM – Science,Technology, Engineering, Math) დარგებით დაინტერესებულ მე-12 კლასელებს გააცნონ ქიმიის, ბიოლოგიის, ფიზიკის, მათემატიკის და ინჟინერიის სფეროს უახლესი აღმოჩენები და მიღწევები, აშშ-ისუმაღლესი განათლების სისტემა, საერთაშორისო აკრედიტაციის მნიშვნელობა და სხვა საინტერესო თემები.
სან დიეგოს სახელმწიფო უნივერსიტეტის პროფესორები 11 დეკემბერს ბათუმში ასევე გამართავენ STEM აკადემიას – ერთდღიან სემინარს, სადაც ლექციებს წაუკითხავენ სან დიეგოს სახელმწიფო უნივერსიტეტში ჩაბარების მსურველ აბიტურიენტებს, დაახლოებით 100 მეთორმეტე კლასელს მთელი აჭარიდან. სან დიეგოს სახელმწიფო უნივერსიტეტი (SDSU) ათასწლეულის გამოწვევის ფონდი – საქართველოს უმაღლესი განათლების კომპონენტის ფარგლებში, საქართველოში 2015 წლიდან ახორციელებს მაღალი ხარისხის, საერთაშორისო აკრედიტაციის მქონე (ABET, ACS, WASC) საბაკალავრო პროგრამებს საინჟინრო და ტექნოლოგიურ (STEM) დარგებში.
კურსდამთავრებულები მიიღებენ ამერიკულ დიპლომს. აღნიშნული პროგრამები ხელს შეუწყობს საქართველოში საბუნებისმეტყველო და ტექნოლოგიური დარგების განვითარებასა და ქვეყანაში მაღალკვალიფიციური სამუშაო ძალის მომზადებას. პროექტი ხორციელდება აშშ-ის ათასწლეულის გამოწვევის კორპორაციის (MCC) მეორე კომპაქტის ფინანსური მხარდაჭერით.
