Batumelebi | ინციდენტი „ქართული ოცნების” ოფისში ინციდენტი „ქართული ოცნების” ოფისში – Batumelebi
RU | GE  

ინციდენტი „ქართული ოცნების” ოფისში

 ნათია ზოიძე

 

„დღეს გამთენიისას ქობულეთში „ქართული ოცნების“ ოფისი დაარბიეს“ – ასე აფასებს  „ქართულო ოცნება“ დილის 5 საათზე, ქობულეთში მომხდარ ინციდენტს. 

 

„ჩამტვრეულია  დარაბები, ჩამოხეულია ივანიშვილის პორტრეტი, მწყობრიდან არის გამოსული განათების სისტემა“ – აცხადებს ქობულეთის „ქართული ოცნების“  შტაბის უფროსი  კობა ნაკაიძე.

 

მისი განცხადებით ოფისში სიგნალიზაციის სისტემა ჩაირთო და შემთხვევის ადგილზე მოვიდა საპატრულო პოლიცია, რომელმაც დააკავა  პირი, გვარად ხინიკაძე. ის ოფისის კუთვნილი ინვენტარის დაზიანების დროს დააკავეს. 

 

 

„ქართული ოცნების“ ქობულეთის შტაბის ხელმძღვანელი კობა ნაკაიძე აცხადებს, რომ პირი, რომელიც საპატრულო პოლიციამ დააკავა, უკვე თავისუფალია. ამ ინფორმაციის გადამოწმება  ამ ეტაპზე ვერ ხერხდება. 

 

 

ნაკაიძის განცხადებით აღნიშნული პიროვნება ამოიცნეს „ქართული ოცნების“ წარმომადგენლებმაც. მისი თქმით, ამ პიროვნებამ  ხუთ ნომრიანი მაისურით ორჯერ სცადა „ქართული ოცნების“ მაჟორიტარი კანდიდატის მოსახლეობასთან შეხვედრის ჩაშლა ქობულეთში ბოლო ორი კვირის განმავლობაში. ნაკაიძის განცხადებით ამ ფაქტების ამსახველი ვიდეო -მასალა  „ინფო 9“- ს გააჩნია. 

 

 

გაზეთი „ბათუმელები“ სახლის მეპატრონეს, ზურაბ ცენტერაძეს  დაუკავშირდა, რომელიც უკვე დაკითხეს საპატრულო პოლიციის თანამშრომლებმა. ცენტერაძის მობილური სხვა პირმა აიღო და განაცხადა, რომ მედიის წარმომადგენლებს ცენტერაძე, მოგვიანებით, თავად დაუკავშირდება. 

 

 

„ბათუმელები“ ფაქტის გადამოწმების მიზნით შსს პრესამსახურის უფროსს, სალომე მახარაძესაც დაუკავშირდა. სალომე მახარაძემ განაცხადა, რომ კომენტარს ინფორმაციის გაცნობის შემდეგ გააკეთებს. 

 

 

 „ქართული ოცნების” მაჟორიტარობის კანდიდატი ბათუმში, მურმან დუმბაძე აცხადებს, რომ ბოლო ერთი კვირის განმავლობაში „ქართული ოცნების“ მისამართით  უკვე  მესამე პროვოკაცია განხორციელდა. მისი განცხადებით, 29 აგვისტოს, ბერას კონცერტის შემდეგ, ტერიტორიაზე ვერცხლისფერი ჯიპი, ნომრით – 004 – გამოჩნდა, საიდანაც  გადმოვიდა პირი, რომელიც  ბერას და ბიძინა ივანიშვილის მისამართით  იგინებოდა. მურმან დუმბაძის განცხადებით, ბათუმის ოფისთან 3 სექტემბერს, საღამოს, დაახლოებით 8 – 9 საათზე ორი პირი მოვიდა და ივანიშვილს უცენზურო სიტყვებით მოიხსენიებდნენ.

 

 

ახალგაზრდა იურისტთა ასოციაციის აჭარის ფილიალის ხელმძღვანელი პარმენ ჯალაღონია აცხადებს, რომ ქობულეთში, „ქართული ოცნების“ ოფისში მომხადარი ფაქტი აშკარა სამართალდარღვევა და   ორგანიზაცია აპირებს თვალი მიადევნოს, როგორი რეაგირება მოყვება ამ ფაქტს სამართლდამცავების მხრიდან. 

 

ამ ეტაპზე უცნობია აღიძრა თუ არა სისხლის სამართლის საქმე.

ნეტგაზეთის მასალების სხვა გამოცემებში გადაბეჭდვის წესი
ნათია ზოიძე