უკრაინის პრეზიდენტი, ვოლოდიმირ ზელენსკი აზერბაიჯანის შემდეგ დღეს, 3 მაისს, სომხეთის დედაქალაქ ერევანში ჩავიდა. ამის შესახებ ზელენსკიმ თავად გამოაქვეყნა: „ჩავედი ევროპის პოლიტიკური თანამეგობრობის სამიტში მონაწილეობის მისაღებად. წინ ბევრი შეხვედრა გველის. მთავარია, მეტი უსაფრთხოება და კოორდინაცია ყველა ჩვენგანისთვის. დიდება უკრაინას!“ – დაწერა ვოლოდიმირ ზელენსკიმ.
როგორც სომხური მედია წერს, მას ზვარტნოცის აეროპორტში პარლამენტის თავმჯდომარე ალენ სიმონიანი დახვდა.
ხვალ, 4 მაისს, სომხეთში ევროპული პოლიტიკური საზოგადოების (EPC) მე-8 სამიტი გაიმართება თემაზე – „მომავლის მშენებლობა: ერთიანობა და სტაბილურობა ევროპაში“.
შესაბამისად, ერევანში უკვე ჩაფრინდა ევროკავშირის დელეგაცია, რომლის შემადგენლობაში არიან: ევროკომისიის პრეზიდენტი ურსულა ფონ დერ ლაიენი, ევროპული საბჭოს პრეზიდენტი ანტონიუ კოშტა, ევროპარლამენტის ხელმძღვანელი რობერტა მეცოლა და ევროკავშირის საგარეო უწყების ხელმძღვანელი კაია კალასი, ასევე ბელგიის პრემიერ-მინისტრი ბარტ დე ვევერი, მოლდოვის პრეზიდენტი მაია სანდუ, რუმინეთის პრეზიდენტი ნიკუშორ დანი, ჩეხეთის პრემიერ-მინისტრი ანდრეი ბაბიში, პოლონეთის პრემიერ-მინისტრი დონალდ ტუსკი, სერბეთის პრემიერ-მინისტრი ჯურო მაკუტი, მონაკოს პრინცი ალბერ II , საბერძნეთის პრეზიდენტი კონსტანტინოს ტასულასი, ლუქსემბურგის პრემიერ-მინისტრი ლუკ ფრიდენი, ბულგარეთის პრეზიდენტი ილიანა იოტოვა, კანადის პრემიერ მინისტრი ანიტა ანანდი.
სამიტში მონაწილეობის მისაღებად სომხეთში იმყოფებიან ასევე „ოცნების“ პრემიერი – ირაკლი კობახიძე და მინისტრი მაკა ბოჭორიშვილი.
არმენპრესის“ ცნობით, ფაშინიანმა ფეისბუქის საკუთარ გვერდზე გამოქვეყნებულ ვიდეოში შეახსენა საზოგადოებას, რომ ამ მოვლენებთან დაკავშირებით ერევანში დაწესდება მოძრაობის შეზღუდვები, რაც მოქალაქეებს გარკვეულ დისკომფორტს შეუქმნის.
მან აღნიშნა, რომ 5 მაისს საფრანგეთის პრეზიდენტის, ემანუელ მაკრონის სახელმწიფო ვიზიტი შედგება, რომლის ფარგლებშიც სომხეთის პრემიერ-მინისტრი და საფრანგეთის პრეზიდენტი გიუმრისაც ეწვევიან და სომეხი და ფრანგი ვარსკვლავების მონაწილეობით გამართულ კონცერტს დაესწრებიან.
5 მაისს ასევე გაიმართება სომხეთი-ევროკავშირის პირველი სამიტი.
