Batumelebi | პრეზიდენტის მიერ წარმატებულად მოხსენიებულ ბიზნესმენს მოსახლეობა ედავება პრეზიდენტის მიერ წარმატებულად მოხსენიებულ ბიზნესმენს მოსახლეობა ედავება – Batumelebi
RU | GE  

პრეზიდენტის მიერ წარმატებულად მოხსენიებულ ბიზნესმენს მოსახლეობა ედავება

ლუკა ასათიანის 13 ნომერში სამშენებლო კომპანია „გლობამშენი“-ის წარმომადგენლებს მოსახლეობა სამშენებლო სამუშაოების გაგრძელების საშუალება არ აძლევს. ინციდენტის ადგილას არიან საპატრულო პოლიციის წარმომადგენლებიც.



კომპანია „გლობამშენი“ ლუკა ასათიანის 13 ნომერში 8 სართულიან სახლს აშენებს. სახლის მშნებლობის დროს მეზობლად მდებარე ექვსი ოჯახს მნიშვნელოვანი პრობლემები შეექმნა. საძირკველის გათხრის დროს ექვსივე ოჯახის საცხოვრებელი სახლები დაზიანდა. მოქალაქეები ითხოვენ, რომ ჯერ მათი სახლები გამაგრდეს და მშენებელმა შემდეგ გაანახლოს მრავალფუნქციური სახლის მშენებლობა.
„ჩვენ ყოველდღიურად საფრთხის წინაშე ვართ, მფლობელი კი ქეიფობს მის მიერ აშენებულ კოშკ-რესტორანში და ჩვენ არ ვაინტერესებთ“ – აცხადებს ლუკა ასათიანის 11 ნომერში მცხოვრები სულიკო ნაჭყებია. იგი მშენებელი კომპანიის მფლობელ, სანდრო შარაშიძეს გულიხმობს, რომელიც საქართველოს პრეზიდენტმა მიხეილ საკაშვილმა დაახლოებით 2 კვირის წინ მოიხსენია, როგორც ადგილობრივი წარმატებული ბიზნესმენი. შარაშიძე ეკუთვნის ახალ ბულვარში აშენებული კოშკი, კომპანია ძირითადად სახლების მშენებლობით არის დაკავებული.



ნოდარ მალაყმაძეც ლუკა ასათიანის ქუჩაზე ცხოვრობს. იგი ამბობს, რომ მშენებელმა კომპანიამ მშენებლობა ისე დაიწყო, რომ მათთან, როგორც მეზობლებთან, ხელშეკრულება არ გაუფორმებია: „თავიდანვე ცხადი იყო, რომ ამ სახლის საძირკველი ისე ვერ გაითხრებოდა, რომ მეზობლებს ზიანი არ მოგვდგომოდა, თანაც მშენებლობა ისე დაიწყეს, რომ ნებართვა არ ჰქონდათ, ვუჩივლეთ და ზედამხედველობის სამსახურმა 5000 ლარით დაჯარიმა“ – ამბობს ნოდარ მალაყმაძე.



ლალი ბაგრატია: „სახლამდე მისავლელი სამანქანო გზაც არ დატოვეს, სახლამდე მანქანით ვეღარ შევდივართ, ბარაკის ტიპის სახლს ხანძარი რომ გაუჩნდეს, სახანძრო მანქანაც ვერ შემოვა.“
კომპანიის გენერალური დირექტორი რეზო დავითაძე აცხადებს, რომ ამ სახლების გამაგრებას მაშინ დაიწყებენ, როცა „ახალი სახლის საძირკველის მშნებლობა მეზობლების დაბზარულ კედლამდე მიაღწევს“. ის ასევე აღიარებს, რომ მშნებლობის დაწყება კანონდარღვევით მოხდა, რის გამოც ჯარიმა გადაიხადეს. მეზობლების უკმაყოფილება გამოიწვია გენერალური დირექტორის ინტერვიუმ, სადაც ის ამბობდა, რომ შესაძლო ზიანისთვის მოქალაეები ყოველთვიურად იღებენ თანხას.



მეზობლებმა მას ამ ხელშეკრულების წარმოდგენა მოთხოვეს, რაც იმ დროის მონაკვეთში, რომელიც „გაზეთ ბათუმელებმა ინციდენტის ადგილას დაჰყო, კომპნიის წარმომადგენელმა ვერ შეძლო. „ბათუმელებს“ ასევე უარი უთხრეს ოფისში ამ დოკუმენტის ჩვენებაზე.

ნეტგაზეთის მასალების სხვა გამოცემებში გადაბეჭდვის წესი
netgazeti.ge