დღეს, 25 ნოემბერს, ბათუმის საკრებულოში ბათუმის მერიის 2017 წლის ბიუჯეტის პროექტი განიხილეს. განხილვას მოქალაქეებიც ესწრებოდნენ. ჯავახიშვილის ქუჩის 78ა ნომერში მცხოვრებმა მოქალაქემ თქვა, რომ მას შემდეგ, რაც ე.წ. იაფი სახლის მშენებლობის პროცესი შეწყდა, მისი საცხოვრებელი სახლი ზიანდება, კერძოდ კი საფრთხეს წარმოადგენს “ხელმისაწვდომი საცხოვრისის” ამოთხრილი საძირკველი, რომელშიც წყალი დგება.
შეგახსენებთ, რომ „ხელმისაწვდომი საცხოვრისის“ მშენებელი კომპანია „კონვენტ ჯორჯია“, რომელსაც მერიამ ორ მილიონამდე ლარი გადაუხადა, რამდენიმე თვის წინ გაუჩინარდა. კომპანიამ, რომელმაც დაახლოებით ერთი წლის წინ მოიგო ბათუმის მერიიის მიერ გამოცხადებული „ხელმისაწვდომი საცხოვრისის“ მშენებლობის ტენდერი, არც მუშების ხელფასი გადაიხადა და არც ნისიად წამოღებული სამშენებლო მასალების თანხა.
ჯავახიშვილის ქუჩის 78ა ნომერში მცხოვრებმა მოქალაქემ ითხოვა, რომ მერიამ მომავალი წლის ბიუჯეტში გაითვალისწინოს „ხელმისაწვდომი საცხოვრისის“ შეწყვეტილი მშენებლობის შედეგად მისთვის მიყენებული ზარალის ანაზღაურება.
როგორც შეხვედრაზე აღინიშნა, ბათუმის მომავალი წლის ბიუჯეტი 139 590 000 ლარით განისაზღვრა.
ამავე თემაზე: “იაფი სახლის” მშენებელი კომპანია, რომელსაც მერიამ ორ მილიონამდე ლარი გადაუხადა, გაუჩინარდა
