რუსეთში ინტერნეტის მიწოდება სრულად აღდგება მას შემდეგ, რაც შეზღუდვები აღარ იქნება საჭირო, განაცხადა რუსეთის პრეზიდენტის, პუტინის პრესმდივანმა დიმიტრი პესკოვმა დღეს, 14 აპრილს ბრიფინგზე.
„ცხადია, რომ ინტერნეტის შეზღუდვა ბევრ მოქალაქეს უხერხულობას უქმნის. მაგრამ ახლა ასეთი დროა.
როგორც კი ამ ზომების საჭიროება გაქრება, [ინტერნეტის] მუშაობაც სრულად აღდგება და ნორმალიზდება“, – თქვა პესკოვმა.
მან აღნიშნა, რომ ამჟამად ინტერნეტი უსაფრთხოების გამოა შეზღუდული.
პესკოვმა ხაზი გაუსვა, რომ რუსეთის მოქალაქეების „უმრავლესობას ესმის ამის აუცილებლობა“.
დღეს, 14 აპრილს, „ბლუმბერგმა“ წყაროებზე დაყრდნობით გაავრცელა ინფორმაცია, რომ რუსეთის ხელისუფლება ინტერნეტის შეზღუდვებთან დაკავშირებით მიდგომის გადახედვას განიხილავს, რადგან ინტერნეტის შეზღუდვა პუტინის რეიტინგს აზიანებს.
სააგენტოს წყაროების თქმით, რუსეთის ხელისუფლებამ შესაძლოა შეაჩეროს რეპრესიები, რაც პოპულარულ სოციალურ ქსელს, Telegram-ს რუსეთში ოპერირების გაგრძელების საშუალებას მისცემს.
„როსკომნადზორმა“ (რუსეთის ფედერალური აღმასრულებელი სააგენტო) 10 თებერვალს დაიწყო Telegram-ის მესენჯერის მუშაობის შეზღუდვა.
Telegram-ი ერთ-ერთი უკანასკნელი მესენჯერია რუსეთში, რომელიც დღემდე ლეგალურად მუშაობს. WhatsApp, FB/მესენჯერი, ინსტაგრამი და სხვა სოცქსელები ყველა უკვე დაბლოკილია. აკრძალულია youtube-იც.
ტელეგრამის გარდა, მოქალაქეები ჩივიან, რომ ქვეყანაში შეზღუდულია ინტერნეტთან წვდომა.
