დამეწყრილი სოფელ კურსების დასახმარებლად ფონდი შეიქმნა

სოფელ კურსების მცხოვრებთა დასახმარებლად, სადაც მეწყერმა რამდენიმე ათეული ოჯახი უსახლკაროდ დატოვა, ფონდი შეიქმნა.

ფონდში თანხის ჩარიცხვა ნებისმიერ მსურველს შეეძლება.

„ადამიანებმა დაკარგეს საცხოვრებელი სახლები, მიწები, მამა-პაპის საფლავები… მიწამ ჩაყლაპა წლების ნაშრომი და ჯერ კიდევ ბუნდოვანია, წინ რა გველოდება.

სწორედ ამიტომ, ვქმნით ფონდს სოფლის მკვიდრი მაცხოვრებლებისთვის, ვინც მეწყერში მუდმივი საცხოვრებელი დაკარგა.

ფონდში შემოსული თანხა სრულად მოხმარდება ადგილობრივ მოსახლეობას.

თანხების ტრანზაქცია იქნება გამჭვირვალე და არცერთი თეთრი არ დაიკარგება.

ფონდი შეიქმნა კურსების მცხოვრებლების მიერ და მიზნად ისახავს, ამ ურთულეს დროში ერთმანეთს მცირედით მაინც შევუმსუბუქოთ ტკივილი და გაჭირვება,“ – ნათქვამია ფონდის შემქმნელთა მიმართვაში.