ბათუმის 2025 წლის ბიუჯეტის შესრულების ანგარიშის მიხედვით, ქალაქის ბიუჯეტში ამ წელს სათამაშო ბიზნესიდან 73 მილიონ 934 ათას 100 ლარი შევიდა.
ეს 5,9 მილიონი ლარით მეტია, ვიდრე მერიას ჰქონდა დაგეგმილი [გეგმა 68 მილიონი ლარი იყო].
სათამაშო ბიზნესის მოსაკრებელში შედის მოსაკრებელი როგორც სამორინეებიდან, ასევე წამახალისებელი გათამაშებიდან და სათამაშო აპარატებიდან.
შესაბამისად, 2025 წელს ბათუმის ბიუჯეტში ჯამში, სათამაშო აპარატებიდან შევიდა 35 387 500 ლარი; წამახალისებელი გათამაშებიდან – 532 600 ლარი; სხვა არაკლასიფიცირებული სათამაშო ბიზნესის მოსაკრებლიდან [კლუბის მაგიდიდან, სამორინეს მაგიდიდან] კი – 38 014 000 ლარი.
2026 წლის განმავლობაში სათამაშო ბიზნესიდან მოსაკრებელი ბათუმის მერიას 71 მილიონი ლარით აქვს განსაზღვრული.
ბათუმის 2025 წლის ბიუჯეტის შესრულების ანგარიშის მიხედვით, ბოლო 11 წელში ქალაქის ბიუჯეტში სათამაშო ბიზნესიდან ჯამში 413 მილიონ 474 ათას 700 ლარი შევიდა.
სათამაშო ბიზნესიდან მოსაკრებელი ბათუმის ბიუჯეტში წლების მიხედვით [ათასი ლარი] / წყარო: ბათუმის 2025 წლის ბიუჯეტის შესრულების ანგარიში
სათამაშო ბიზნესის ნებართვის მფლობელთა რეესტრის მიხედვით, 2026 წლის 11 მარტის მდგომარეობით, ბათუმში ასეთი ბიზნესის სულ 63 ნებართვაა გაცემული.
აქედან 16 ნებართვა უშუალოდ სამორინეს მოწყობაზე.
შემოსავლების სამსახურის ინფორმაციით, 2025 წლის დეკემბრის მდგომარეობით, აზარტულ და მომგებიან თამაშობებზე აკრძალულ პირთა სიაში შეტანილი იყო 1 577 247 პირის შესახებ ინფორმაცია.
ამასთან, შემოსავლების სამსახურის მონაცემთა ბაზაში, დამოკიდებულ პირთა სიაში რეგისტრირებული იყო 36 115 ფიზიკური პირი, აქედან მოსამართლის ბრძანების საფუძველზე 62 პირი, ხოლო თავად პირის მომართვის საფუძველზე – 36 053.
ამ თემაზე:
აზარტულ თამაშებზე დამოკიდებულთა სიაში 36 115 პირია რეგისტრირებული
