ბათუმის მერია, გამოცხადებული რეორგანიზაცია-რესტრუქტურიზაციის ფარგლებში, განყოფილებებს მათი ფუნქციების შესაბამისად აერთიანებს, რიგ სამსახურებს კი აუქმებს და ახალს ქმნის.
მერიის ინფორმაციით, რეორგანიზაციის შედეგად არსებული 170 საშტატო ერთეული 134- მდე უნდა შემცირდეს. ეს ნიშნავს, რომ 36 შტატი გაუქმდება.
ვინ დაკარგავს სამსახურს და ხომ არ არიან მათ შორის ის პირები, რომლებიც EU-თან მოლაპარაკების პროცესის შეჩერებას სპეციალური განცხადებით გაემიჯნენ? – ამაზე კითხვა საკრებულოს სხდომაზე „ლელოს“ წარმომადგენელმა, ვაჟა დარჩიამ დასვა, თუმცა დაზუსტებული პასუხი ვერ მიიღო. მას უთხრეს, რომ ვინ წავა და ვინ დარჩება, ჯერ არავინ იცის.
ახალი სტრუქტურის პროექტის მიხედვით ერთიანდება ორი, სამართლებრივი უზრუნველყოფის და სასამართლოსთან ურთიერთობის – ადმინისტრაციული დავების განყოფილება.
არქივის განყოფილება, საჯარო ინფორმაციის გაცემა და მასთან დაკავშირებული უფლება-მოვალეობები გადაეცემა იურიდიულ განყოფილებას, ხოლო ნომენკლატურის შემუშავების, საარქივო წარმოების და მასთან დაკავშირებული საქმიანობა გადაეცემა საქმისწარმოების განყოფილებას.
მერიის ინფორმაციით, მეორადი სტრუქტურული ერთეულები, ანუ განყოფილებები, რეორგანიზაციის შედეგად 21-მდე მცირდება.
ბათუმის მერიის უკვე დამტკიცებული ცვლილების შესაბამისად, მუნიციპალური ქონების და სერვისების მართვის სამსახურს სახელწოდება შეუცვალეს და მუნიციპალური ქონების მართვის სამსახური უწოდეს, მუნიციპალური პოლიტიკის სამსახურს კი საერთოდ აუქმებენ.
იქმნება ეკონომიკური განვითარებისა და მუნიციპალური ორგანიზაციების მართვის სამსახური.
მერიაში განმარტეს, რომ „დაკისრებული ფუნქციებისა და უფლება-მოვალეობის ერთი და იმავე პროფესიული საქმიანობიდან გამომდინარე“ ერთიანდება სამართლებრივი უზრუნველყოფისა და სასამართლოსთან ურთიერთობის – ადმინისტრაციული დავების განყოფილება.
მატერიალური და ტექნიკური უზრუნველყოფის განყოფილებისთვის დაკისრებულ ფუნქციებს კი ხელშეკრულებით დასაქმებული პირები შეასრულებენ.
მოქალაქეთა საკითხების განყოფილება გაერთიანდება მედიასა და საზოგადოებასთან ურთიერთობის განყოფილებასთან და მასვე გადაეცემა მუნიციპალური პოლიტიკის სამსახურის, საერთაშორისო ურთიერთობის და პროტოკოლის განყოფილების ფუნქციები. განყოფილების სახელწოდება საზოგადოებასთან ურთიერთობისა და პროტოკოლის განყოფილება იქნება.
მუნიციპალიტეტის მერიის განათლების, კულტურის, სპორტისა და ახალგაზრდობის სამსახურის კულტურის განყოფილება ერთიანდება განათლებისა და ახალგაზრდობის განყოფილებასთან, შესაბამისად ერთიანდება მათი უფლება-მოვალეობები.
შიდა აუდიტის სამსახურის შიდა აუდიტის განყოფილება ერთიანდება რეკომენდაციების მონიტორინგის განყოფილებასთან.
მოქმედი დებულებით შიდა აუდიტის განყოფილება ახორციელებს აუდიტორულ შემოწმებას და გასცემს რეკომენდაციას, ხოლო რეკომენდაციების მონიტორინგის განყოფილება გაცემულ რეკომენდაციებს უწევს მონიტორინგს. მერიაში მიიჩნევენ, რომ ამ განყოფილებათა გაერთიანების შედეგად მოხდება უფლებამოსილებათა და შესასრულებელ ამოცანათა ოპტიმიზაცია, რაც საბოლოოდ გააუმჯობესებს სამსახურის უფლება -მოვალეობების უკეთ შესრულებას.
უქმდება მუნიციპალიტეტის მერიის ეკონომიკური განვითარებისა და მუნიციპალური ორგანიზაციების მართვის სამსახური, სამაგიეროდ ქმნიან ახალ სამსახურს:
მერიის განმარტებით, ახალი სამსახურის შექმნა, ფუნქციათა და უფლება-მოვალეობათა ახლებურად ჩამოყალიბება უპირველესად გულისხმობს მუნიციპალიტეტის ეკონომიკური პოტენციალის იდენტიფიცირებას და საინვესტიციო აქტივობების მხარდაჭერას, ეკონომიკური პროფილის გაძლიერებას და დივერსიფიცირებას, აგრეთვე ინვესტიციებისა და საგრანტო რესურსების მოზიდვის ხელშეწყობას.
მუნიციპალური ქონების მართვის სამსახურის ეკონომიკური საქმიანობის ნებართვების განყოფილების უფლებამოსილებები ნაწილდება მუნიციპალური ქონების განკარგვის განყოფილებასა და სახელშეკრულებო მონიტორინგის განყოფილებაზე.
პროექტების დამტკიცებიდან ერთ თვეში სამსახურის შესაძლო დატოვების შესახებ თანამშრომლები უკვე გააფრთხილეს. შესაბამისი განკარგულების პროექტები ბათუმის საკრებულომ 30 იანვარს დაამტკიცა.
მოქმედი საშტატო ნუსხის და დებულების მიხედვით, ბათუმის მერს ჰყავს ვიცე-მერი და ორი მოადგილე, მოქმედებს 8 პირველადი სტრუქტურული ერთეული, რომელიც აერთიანებს ადმინისტრაციას და სამსახურებს, სამსახურები აერთიანებს ასევე განყოფილებებს.
