10 იანვრის ღამეს, რუსეთმა უკრაინას ბალისტიკური რაკეტა „ისკანდერ-მ“-ითა და 121 უპილოტო საფრენი აპარატით შეუტია. უკრაინის საჰაერო ძალების ინფორმაციით, ქვეყნის თავდაცვის სისტემებმა 94 დრონის ჩამოგდება და გაუვნებელყოფა შეძლეს.
გამოცემა „უკრაინსკა პრავდას“ ცნობით, ბოლო მონაცემებით, შეტევა დილითაც გრძელდებოდა.
10 იანვრის დილას აფეთქებების ხმა გაისმა ოდესაშიც. ინფორმაციას ამის შესახებ ოლქის სამხედრო ადმინისტრაცია და უკრაინის საჰაერო ძალები ავრცელებენ.
„ქალაქში ხმაურია! დარჩით უსაფრთხო ადგილებზე“, — მიმართა მოსახლეობას საოლქო სამხედრო ადმინისტრაციის ხელმძღვანელმა, სერგეი ლისაკმა.
რუსულმა მხარემ იერიში ოდესის რაიონის სამრეწველო ინფრასტრუქტურაზე მიიტანა. უკრაინული მხარის განმარტებით, თავდასხმის შედეგად საპორტო საწარმოს ტერიტორიაზე დაზიანდა ცარიელი რეზერვუარი და ცეცხლი გაუჩნდა საიზოლაციო მასალას. წინასწარი მონაცემებით, შემთხვევის შედეგად არავინ დაშავებულა.
რუსეთის თავდაცვის უწყების მტკიცებით, მათმა ავიაციამ უკრაინის 153 რაიონში სხვადასხვა ობიექტზე, მათ შორის ენერგეტიკულ ინფრასტრუქტურასა და საწვავის საცავებზე მიიტანა იერიში. რუსული მხარე ასევე ამტკიცებს, რომ დაარტყეს უკრაინული შენაერთებისა და „უცხოელი დაქირავებული მებრძოლების“ დროებითი დისლოკაციის პუნქტებს.
____________
ფოტოზე: 9 იანვარი, კიევი, რუსული დრონის თავდასხმის შედეგად უკრაინის დედაქალაქში კორპუსი დაზიანდა. ფოტო: ევროპის პრესფოტო სააგენტო. EPA/YULIIA OVSIANNIKOVA
