„ქართული ოცნების“ პრემიერ-მინისტრის 2025 წლის 30 დეკემბრის განკარგულებით, შეიქმნა კომისია, რომელიც სურსათის ფასების საკითხზე იმუშავებს.
სასურსათო პროდუქციის ფასებთან დაკავშირებით სამთავრობო საკოორდინაციო კომისიის შექმნის შესახებ „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის 29-ე მუხლის პირველი პუნქტის შესაბამისად, შეიქმნას სასურსათო პროდუქციის ფასებთან დაკავშირებით სამთავრობო საკოორდინაციო კომისია შემდეგი შემადგენლობით:
კომისიას უხელმძღვანელებს თავად ირაკლი კობახიძე
კომისიის წევრები არიან ოცნების მთავრობის შემდეგი წევრები:
1. მარიამ ქვრივიშვილი – ეკონომიკისა და მდგრადი განვითარების მინისტრი
2. დავით სონღულაშვილი – გარემოს დაცვისა და სოფლის მეურნეობის მინისტრი
3. ლაშა ხუციშვილი – ფინანსთა მინისტრი
4. მიხეილ სარჯველაძე – ჯანდაცვის მინისტრი
5. მამუკა მდინარაძე – სუსის უფროსი
6. ლევან ჟორჟოლიანი – მთავრობის ადმინისტრაციის უფროსი
7. ირაკლი ლექვინაძე – კონკურენციისა და მომხმარებლის დაცვის სააგენტოს თავმჯდომარე
ქვეყანაში არსებულ მაღალ ფასებზე პირველად ირაკლი კობახიძემ 24 დეკემბერს განაცხადა. ირაკლი კობახიძემ მაღაზიებში სურსათზე ფასების ზრდა სუპერმარკეტებისა და დისტრიბუტორების ქსელებს გადააბრალა. ამის შემდეგ პარლამენტმა შექმნა კომისია ამ საკითხის შესასწავლად, ხოლო სუს-მა მოკვლევა დაიწყო.
