„ნაციონალური მოძრაობის“ სიის პირველი ნომერი აჭარის უმაღლესი საბჭოს არჩევნებში და აჭარის მთავრობის ყოფილი თავმჯდომარე, ლევან ვარშალომიძე, დღეს 31 ოქტომბერს გამართულ ბრიფინგზე აცხადებს, რომ არჩევნების საბოლოო შედეგების გამოცხადების შემდეგ გადაწყვეტს, შევა თუ არა უმაღლეს საბჭოში.
„ჩვენ ვმუშაობთ იმ დარღვევებზე, რომელიც იქნა დაფიქსირებული აჭარის ბევრ უბანზე. 80-ზე მეტი საჩივარია დაწერილი. კანონმდებლობის მიხედვით, ხვალ 18:00 საათამდე გვაქვს უფლება, რომ ოლქებში გავასაჩივროთ. ამიტომ, ჩვენ გამოვიყენებთ ყველა გზას, კიდევ ერთხელ დავადასტუროთ თუ რა ხდებოდა საარჩევნო უბნებზე და საარჩევნო პროცესში.
ბრძოლა გრძელდება, რომ დავიცვათ თითოეული ჩვენი ამომრჩევლის ხმა. დარღვევები იყო მარკირებასთან დაკავშირებით, გაგვახსენეს ძველი პერიოდი, როცა შუქი ქრებოდა. ბევრი ფაქტი იყო ხელვაჩაურში შუქის ჩაქრობის, მთიანი აჭარა მთლიანად იყო პარალიზებული რამდენიმე საათით და შემდეგ სოფელ-სოფელ აქრობდნენ შუქს“.
ლევან ვარშალომიძე ამბობს, რომ დარღვევების შესახებ ინფორმაცია მიაწოდეს საერთაშორისო ორგანიზაციებს, საელჩოებს.
ჟურნალისტების კითხვაზე, აპირებს თუ არა აჭარის უმაღლეს საბჭოში შესვლას? ლევან ვარშალომიძე ამბობს, რომ ეს ინფორმაცია არჩევნების საბოლოო შედეგების შემდეგ გახდება ცნობილი.
„აუცილებლად გეტყვით ჩვენს გადაწყვეტილებას, ამისთვის ველოდებით შედეგების ოფიციალურ შეჯამებას“.
აჭარის უმაღლეს საბჭოში შესვლას არ აპირებს, „პატრიოტთა ალიანსის“ სიის პირველი ნომერი დავით თარხან-მოურავი. მის ნაცვლად, უმაღლეს საბჭოში, საარჩევნო სიის მეორე ნომერი, ზაზა ოქუაშვილი შევა.
