აჭარის უმაღლესი საარჩევნო კომისიის ინფორმაციით, პროპორციული სიის 15-მა წევრმა, რომლებიც 2016 წლის საპარლამენტო და უმაღლესი საბჭოს არჩევნების შედეგების მიხედვით სავარაუდოდ, დეპუტატები გახდებიან, ნარკოლოგიური შემოწმების ცნობა უსკოში წარადგინეს.
„ნარკოლოგიური ცნობის უსკოში წარდგენის ვადა ჰქონდათ 22 ოქტომბრამდე, თუმცა გუშინ, 14 ოქტომბერს წარმოადგინა იმ 15-ივე პირმა, რომლებიც პროპორციული სიის მიხედვით, სავარაუდოდ დეპუტატები გახდებიან“ – აცხადებენ უსკოში .
2016 წლის უმაღლესი საბჭოს არჩევნების შედეგების მიხედვით, პროპორციული სიით, ახალ უმაღლეს საბჭოში 15 პირი ოთხი პოლიტიკური პარტიიდან შევა. ესენია: „ქართული ოცნება“, „ნაციონალური მოძრაობა“, „პატრიოტთა ალიანსი“ და ნინო ბურჯანაძის პარტია.
რაც შეეხება მაჟორიტარ კანდიდატებს, უსკოს ინფორმაციით, ნარკოლოგიური შემოწმება მაჟორიტარობის კანდიდატებს გავლილი აქვთ. პროპორციული სიით გამსვლელმა კანდიდატებმა კი არჩევნების დასრულების შემდეგ წარმოადგინეს.
აჭარის უმაღლესი საბჭოს და საპარლამენტო არჩევნების მეორე ტურში, მხოლოდ მაჟორიტარი კანდიდატები მონაწილეობენ.
