,,სამართლიანი არჩევნებისა და დემოკრატიის საზოგადოება“ ბათუმში # 79 ოლქში რვა საარჩევნო უბნის შედეგების გაბათილებას და იმ საარჩევნო მოხელეების დასჯას ითხოვს, რომლებმაც ხმები საარჩევნო კოდექსით გათვალისწინებული პროცედურების დარღვევით დათვალეს.
„ დარღვევები მნიშვნელოვანია და ძირითადად დაკავშირებულია უბნის შედეგების ბალანსთან. შემაჯამებელი ოქმების მიხედვით მიღებული ხმებისა და ბათილი ბიულეტენების ჯამი აღემატება არჩევნებში მონაწილე ამომრჩეველთა რაოდენობას, ოქმებს ასევე აკლია აუცილებელი რეკვიზიტები. გამოვყოფდი ამ მხრივ #70.79.31. უბნის ოქმებს, რომლებიც ხელმოუწერელია კომისიის წევრების მიერ. შემაჯამებელი ოქმი არის ინდივიდუალურ-ადმინისტრაციული აქტი, რომელზეც ხელმოწერა კომისიის ყველა წევრის მიერ არის სავალდებულო,“ – განმარტავს ,,სამართლიანი არჩევნებისა და დემოკრატიის საზოგადოების“ აჭარა-გურია-ფოთის რეგიონული კოორდინატორი მადონა ბერიძე.
სამართლიანი არჩევნების 4 საჩივარი ეხება 69.69.01. უბანზე ხმის დათვლის პროცესის დროს გამოვლენილ დარღვევებს; დათვლის პროცესის დროს შესაბამისი დოკუმენტაციის არდალუქვას; სპეცსიის ამომრჩევლებისათვის, კერძოდ, უბნის წევრებისათვის აჭარის პროპორციულ არჩევნებში მონაწილეობის უფლების შეზღუდვას; დათვლის პროცესის დროს არსებულ ქაოსსა და ოქმებში ბალანსის არ არსებობას – ამ ყველაფრის გათვალისწინებით, ორგანიზაცია 69.69.01. უბნის შემაჯამებელი ოქმის ბათილობას ითხოვს.
„სამართლიანი არჩევნები“ 8 უბნის შემაჯამებელი ოქმების ბათილობის პარალელურად, ამ უბნების კომისიების ხელმძღვანელი პირების დისციპლინურ პასუხისმგებლობასაც მოითხოვს.
ორგანიზაცია მოითხოვს #69.79.01, #70.79.54, #69.79.06, #68.79.04, #68.79.41, #70.79.31, #70.79.58 და #68.79.98 შემაჯამებელი ოქმების გაბათილებას და შედეგების გადასინჯვას.
ორგანიზაციას ამ უბნების გარკვეულ ნაწილში ჰყავდა კენჭისყრის დღეს მუდმივი დამკვირვებელი.