“თავისუფალი დემოკრატების” ბათუმის ორგანიზაციის თავმჯდომარე, კობა ჩხეიძე ამბობს, რომ მათი პარტიის დამკვირვებლებმა საარჩევნო უბნებზე სხვადასხვა ტიპის დარღვევები დააფიქსირეს. კობა ჩხეიძე ვარაუდობს, რომ საქმე გვაქვს კარუსელის გზით არჩევნების გაყალბებასთან.
„თავისუფალი დემოკარტების“ ბათუმის ორგანიზაციის ხელმძღვანელის, კობა ჩხეიძის ინფორმაციით, მათმა დამკვირვებლებმა საარჩევნო უბნებზე გამოავლინეს რამდენიმე მარკირებული ამომრჩეველი, რომლებიც განმეორებით ცდილობდნენ ხმის მიცემას:
„15 წუთის წინ ბათუმის 21-ე უბანში გამოვლინდა მარკირებული ადამიანების უბანზე შესვლის მცდელობა. მსგავსი მცდელობა იყო დღის განმავლობაში ხელვაჩაურის 30-ე უბანზე, ბათუმის 71-ე, მე-3 და 36-ე უბნებზე, ასევე ხელვაჩაურის პირველ უბანზე. ეს ყველაფერი მოხდა ბოლო ერთი საათის განმავლობაში. ხელვაჩაურს შემთხვევაში ერთსა და იმავე უბანზე მოხდა ორი ფაქტი“.
კობა ჩხეიძის ინფორმაციით, ჩაქვის 68-ე სამაჟორიტარო ოლქში ერთ-ერთ ქალბატონს სამაგიდო ჟურნალში თავისი გვარის გასწვრივ ხელმოწერა დახვდა. „ეს ნიშნავს, რომ, როგორც ჩანს, საქმე გვაქვს ეგრეთ წოდებულ კარუსელთან, რომლითაც ხდება არჩევნების გაყალბება“, – აცხადებს კობა ჩხეიძე.
კობა ჩხეიძის ინფორმაციით, დაფიქსირდა რამდენიმე შემთხვევა, როცა ამომრჩეველს მარკირების სითხე ნაცვლად ცერა თითისა დასხმული ჰქონდა საჩვენებელ თითზე:
“როგორც ჩანს, სისტემურ ფაქტებთან გვაქვს საქმე, როდესაც პირველ მისვლაზე ადამიანს უკეთებენ საჩვენებელ თითზე მარკირებას, მეორე შემთხვავაში კი ცერა თითზე. ჩვენ გავაფრთხილეთ ჩვენი წარმომადგენლები ყველა უბანზე ათივე თითი შეამოწმონ… ჩვენთვის უცნობია, ასეთი რამდენი შემთხვევა შეიძლება ყოფილიყო, რადგან ხშირ შემთხვევაში ნაკადის მომწესრიგებელი არ იყო ჩვენი წარმომადგენელი“.
კობა ჩხეიძის თქმით, მათმა წარმომადგენელმა მოახერხა კომუნიკაცია ერთ-ერთ მარკირებაგავლილ ადამიანთან, რომელიც განმეორებით ცდილობდა უბანზე შესვლას, რომელმაც განაცხადა, რომ „ცემენტზე მუშაობდა და შეიძლება მაგის გამო აქვს ლაქები“.
როგორც კობა ჩხეიძე ამბობს, სხვა შემთხვევებში მარკირებაგავლილი ადამიანები უბნის ტერიტორიას სასწრაფოდ ტოვებდნენ.
ბათუმის 29-ე საარჩევნო უბანზე მარკირებული მოქალაქეები განმეორებით ცდილობენ შესვლას. ფოტო: გაზეთი ბათუმელები
