პროტესტის ნიშნად მოშიმშილე მაღაროელები ტარიელ მიქაცაძე და მირზა ლოლაძე, კლინიკიდან ისევ ჭიათურაში დაბრუნდნენ.
ისინი ბოლო რამდენიმე დღეა მშრალ შიმშილობაზე იმყოფებოდნენ, რის შედეგადაც მათი ჯანმრთელობის მდგომარეობა დამძიმდა.
როგორც მაღაროელი ირაკლი ჯიქიძე „ბათუმელებს“ ეუბნება, 4 ივლისს, ტარიელის და მირზას მდგომარეობა კრიტიკული იყო, რის გამოც საჭირო გახდა მათი კლინიკაში გადაყვანა.
„გუშინ ტარიელი კომუნიკაციაზე აღარ იყო უკვე და მირზას მდგომარეობაც დამძიმდა. გამოვიძახეთ სასწრაფო და ფაქტობრივად ორივე უგონო მდგომარეობაში წაიყვანეს.
ახლა შედარებით სტაბილურად არიან, კლინიკაში მხოლოდ პირველადი სამედიცინო დახმარება ჩაუტარდათ, რინგერი გადაუსხეს. თუმცა ტარიელიც და მირზაც სხვა მაღაროელებთან ერთად ისევ აგრძელებენ შიმშილობას.
ასევე, კრიტიკულია მერაბ სარალიძის მდგომარეობაც, რომელიც საპატიმროში შიმშილობს. მაღაროელების პროტესტის და მათი მძიმე მდგომარეობის მიუხედავად, არანაირი რეაგირება არ არის არავის მხრიდან“-ამბობს ირაკლი ჯიქიძე.
ტარიელ მიქაცაძესთან და მირზა ლოლაძესთან ერთად შიმშილობენ შავლეგ გოგსაძე, გოგა მოდებაძე, სიმონ მიქაცაძე და ჯანიკო ლაბაძე.
დაპატიმრებული მერაბ სარალიძე კი ციხეში შიმშილობს პროტესტის ნიშნად.
შავლეგ გოგსაძეს, გოგა მოდებაძეს და მირზა ლოლაძეს პირი აქვთ ამოკერილი.
ჭიათურელი მაღაროელები 4 თვეა პროტესტში არიან, ისინი არ ეთანხმებიან „ჯორჯიან მანგანეზის“ მმართველი კომპანიის ( CMC ) ე.წ რეორგანიზაციის პირობებს, რომელიც მათ შრომით უფლებებს არღვევს.
როცა კომპანიამ გარკვეული დროით შეაჩერა მაღაროებში მუშაობა, მაღაროელებს არც დაპირებული კომპენსაცია გადაუხადეს ბოლომდე.
მოშიმშილე მაღაროელები პატიმრობაში მყოფი სამი მაღაროელის გათავისუფლებას და კომპანიას შრომითი პირობების გადახედავს სთხოვენ.
ამ დროისთვის კომპანიამ 2 ათასზე მეტი მაღაროელი დატოვა უმუშევრად.
____________
ამ თემაზე:
ჭიათურაში 6 მაღაროელი პროტესტის ნიშნად შიმშილობს – ერთის მდგომარეობა მძიმეა
