რუსეთის საელჩო აზერბაიჯანში აცხადებს, რომ აზერბაიჯანში მცხოვრები რუსეთის მოქალაქეებისგან, მათ შორის ტურისტებისგან, საჩივრები მიიღო მათ და მათი ოჯახის წევრების მიმართ ფიზიკური ძალადობის, დოკუმენტების შემოწმებისა და სამოქალაქო ტანსაცმელში გამოწყობილი ადამიანების კერძოს სახლებში ვიზიტების შესახებ.
ამის შესახებ რუსული პუტინისტური მედია „ტასი“ წერს ბაქოში რუსეთის საელჩოზე დაყრდნობით.
„ბოლო 24 საათის განმავლობაში საელჩომ მიიღო მრავალრიცხოვანი მიმართვა აზერბაიჯანის რესპუბლიკის ტერიტორიაზე, მათ შორის ტურისტული მიზნით მყოფი რუსეთის ფედერაციის მოქალაქეებისგან.
მათ გვაცნობეს მათ საცხოვრებელ ადგილას სამოქალაქო ფორმაში გამოწყობილი პირების მისვლის შესახებ (ზოგიერთმა თავი პოლიციელად წარადგინა), რომლებმაც დაინტერესდნენ მათი ქვეყანაში ყოფნის მიზნით და შეამოწმეს მათი დოკუმენტები. ზოგიერთი მათგანის თქმით, მათ და მათი ოჯახის წევრების მიმართ ფიზიკური ძალადობა გამოიყენეს“ – ნათქვამია საელჩოს განცხადებაში.
რუსეთსა და აზერბაიჯანს შორის ურთიერთობა განსაკუთრებით მას შემდეგ დაიძაბა, რაც რუსეთში, ქალაქ ეკატერინებურგში ჩატარებული სპეცოპერაციის შემდეგ აზრებაიჯანელები დაიღუპნენ და დაშავდნენ.
აზერბაიჯანის საგარეო საქმეთა სამინისტრომ 28 ივნისს საჯაროდ მოითხოვა რუსეთის ხელისუფლებისგან დეტალური გამოძიება და დამნაშავეთა დასჯა. ბაქომ ასევე გააუქმა რუსეთის ვიცე-პრემიერის, ალექსეი ოვერჩუკის ვიზიტი ქვეყანაში, რადგან „არაგონივრულად“ მიაჩნია ნებისმიერი ოფიციალური პირის ვიზიტი რუსეთის მხრიდან.
ეკატერინბურგის მოვლენების ფონზე აზერბაიჯანში შეჩერდა რუსული მხარის მონაწილეობით დაგეგმილი კონცერტები, ფესტივალები და სპექტაკლები, მოგვიანებით კი აზერბაიჯანის შინაგან საქმეთა სამინისტროს მიერ რუსულ სააგენტოს ქოლგის ქვეშ არსებული Sputnik Azərbaycan-ის ოფისში ჩატარებული ოპერაციის დროს 7 ადამიანი დააკავეს.
ამავე თემაზე:
პესკოვი იმედოვნებს, რომ აზერბაიჯანი დაპატიმრებულ რუს ჟურნალისტებს გაათავისუფლებს
