ბათუმში, დემეტრე თავდადებულის ქუჩა – მემედ აბაშიძისა და გორგილაძის ქუჩებს შორის მონაკვეთში – გადაკეტილია.
აქ ქვაფენილი აყარეს და ასფალტი უნდა დააგონ.
რუსთაველისა და მემედ აბაშიძის ქუჩებიდან მომავალი მანქანები კი გორგილაძის ქუჩაზე შემდეგი მარშრუტით გადავლენ: თავდადებულისა და აბაშიძის კვეთიდან – აბაშიძის ქუჩით ევროპის მოედნამდე და იქიდან მოძრაობას ბარათაშვილის ქუჩით გააგრძელებენ.
ქუჩის გადაკეტვის გამო დროებით შეიცვალა 7, 7ა და 11 ნომრით მოძრავი მუნიციპალური ავტობუსების მარშრუტიც.
ქალაქის მერიის ინფორმაციით თავდადებულის ქუჩა აღნიშნულ მონაკვეთში 14 ივნისამდე იქნება გადაკეტილი.
ბათუმში ქვაფენილი აყარეს რუსთაველის ქუჩის ნაწილზე. ქვაფენილის აყრა რუსთაველისა და გოგებაშვილის ქუჩებზე ოქტომბრიდან გაგრძელდება.
რომელი პროექტის ფარგლებში მიმდინარეობს სამუშაოები თავდადებულის ქუჩაზე? აყრიან თუ არა ქვაფენილს ლუკა ასათიანის [გორგილაძიდან რუსთაველის ქუჩამდე მონაკვეთში], ასევე მარჯანიშვილის ქუჩებზე და როდის? – ამ კითხვით „ბათუმელები“ მერიის საქალაქო ინფრასტრუქტურისა და კეთილმოწყობის სამმართველოს დაუკავშირდა.
სამმართველოს ინფორმაციით, აღნიშნულ მონაკვეთში ქვაფენილის აყრას და ასფალტის დაგებას მერია პერიოდული შეკეთების ფარგლებში ახორციელებს და სამუშაოებს კომპანია „ბონდი-2009“ ასრულებს.
„რაც შეეხება სანიაღვრე ქსელს, ქუჩის აღნიშნულ მონაკვეთში სამუშაოები „ბათუმის წყალმა“ შეასრულა. ლუკა ასათიანისა და მიმდებარე ქუჩებზე ქვაფენილების აყრა კი, ამ ეტაპისთვის გადაწყვეტილი არ არის“ – გვითხრეს მერიის სამმართველოში.
ამავე თემაზე: