ტვ პირველის გადამღებ ჯგუფზე ძალადობას „ახალგაზრდა იურისტთა ასოციაცია ეხმაურება.
„ტელეკომპანია „პირველის“ მიერ გავრცელებული ინფორმაციის თანახმად, ქვემო ქართლში სახელმწიფოს ყოფილი რწმუნებულის პირველი მოადგილის, გიორგი შინჯიკაშვილის, მამა სავარაუდოდ ფიზიკურად გაუსწორდა ტელეკომპანიის ჟურნალისტს მარიამ მაკასარაშვილს, გაიტაცა „TV პირველის“ კუთვნილი კამერა და ჟურნალისტის მობილური ტელეფონი.
მომხდარი ადასტურებს ჟურნალისტების მიმართ გახშირებული ძალადობის ფაქტებს, რასაც პირდაპირ უწყობს ხელს შესაბამისი საგამოძიებო ორგანოების გულგრილობა. ასეთი დამოკიდებულება ახალისებს ძალადობას და აჩენს დაუსჯელობის განცდას.
ისედაც გაუარესებულ მედიაგარემოში, საია გმობს მომხდარს და მოუწოდებს სპეციალურ საგამოძიებო სამსახურს და პროკურატურას გავრცელებულ ინფორმაციაზე მოახდინონ სწრაფი და ეფექტიანი რეაგირება,“ – აღნიშნულია ახალგაზრდა იურისტთა ასოციაციის მიერ დღეს, 12 მაისს გავრცელებულ ინფორმაციაში.
როგორც ნეტგაზეთს სპეციალურ საგამოძიებო სამსახურში განუცხადეს, დაწყებულია გამოძიება ჟურნალისტურ საქმიანობაში ხელის შეშლის ფაქტზე.
ამ თემაზე:
შინჯიკაშვილის მამა ფიზიკურად გაგვისწორდა, წაგვართვა აპარატურა – „ტვ პირველის“ ჟურნალისტი
