„მიუღებელია, რომ სასამართლოს სურს გაფფარ ილმაზის თურქეთში ექსტრადირება,“ – წერს ქართველ მოსამართლეებს წარმოშობით ლაზი პოეტი სელმა კოჩივა ბათუმელი მედროშის, თემურ ქათამაძის შესახებ.
თემურ ქათამაძე ქართველი მუჰაჯირების შთამომავალია, თურქეთის მოქალაქე და საქართველოს მოქალაქეობას წლებია უშედეგოდ ითხოვს. თემურ ქათამაძე მას შემდეგ დააკავეს, რაც ბათუმის პროევროპული აქციების აქტიური მონაწილე გახდა და აქციებზე საქართველოს დროშით ხელში ჩნდებოდა.
თემურ ქათამაძე ამჟამად შსს-ს მიგრაციის დროებითი განთავსების იზოლატორშია, მას ქვეყნიდან გაძევება ემუქრება.
თემურ ქათამაძე [გაფფარ ილმაზი] საქართველოში ლტოლვილის სტატუსს ითხოვს, თუმცა ეს მოთხოვნა სასამართლომ არ დააკმაყოფილა.
წარმოშობით ლაზმამ გერმანიაში მცხოვრებმა სელმა კოჩიოვამ თბილისის სააპელაციო სასამართლოს ღია წერილი გაუგზავნა. ის პედაგოგია და ლაზურ ენაზე ლექსებს წერს.
წლების წინ, თურქეთში თემურ ქათამაძეს სელმასთან და დიასპორის რამდენიმე სხვა ლიდერთან ერთად ქართული დიასპორისთვის ქართული ენის სკოლებში სწავლა მოუთხოვია. სელმა კოჩივა მოსამართლეებს წერს, რომ თემურ ქათამაძის თურქეთისთვის გადაცემა საფრთხის შემცველია.
„თემურ ქათამაძის ადგილი ციხეში კი არა, კულტურულ პროექტებში და დემოკრატიულ საქართველოშია.
ჩვენ დაგვიგროვდა ძალიან ბევრი მოსაყოლი, დასაწერი ამბავი და ეპოსი…
ანკარის ამჟამინდელი პოლიტიკა სამწუხაროდ არაადამიანურად ექცევა მთლიანი რეგიონის დემოკრატიულ ოპონენტებს ისლამო-ფაშისტური ხაზით. ეს საერთოდ არ არის უსაფრთხო ადგილი ჩემნაირი, ქათამაძისნაირი ადამიანებისთვის, რომლებიც ცნობილი არიან თავიანთი ეთნიკური და კულტურული კვლევებით.
თემურ ქათამაძე შეიძლება იყოს საქართველოს წარმატებული კულტურული ელჩი ევროინტეგრაციის პროცესში. მოქალაქეობა თუ არა, მინიმუმ უნდა მიენიჭოს ლტოლვილის სტატუსი,“ – აღნიშნულია მოსამართლეებისთვის სელმა კოჩივას მიერ გაგზავნილ წერილში.
სელმა კოჩივა თბილისში
„მე ლაზეთში დავიბადე, წარმოშობით მეგრელი ვარ, გავიზარდე სტამბულში, ბოლო 45 წელია გერმანიაში ვცხოვრობ, გერმანიის მოქალაქე ვარ…,“ – წერს სასამართლოს სელმა კოჩივა და იმასაც უყვება, როგორ გაიცნო თბილისში თემურ ქათამაძე.
სელმას ქართული ენის მასწავლებელიც ბათუმელი მედროშე გამხდარა.
„ის თვეების განმავლობაში მიტარებდა გაკვეთილებს ქართული ენის გასაუმჯობესებლად და მისგან მივიღე ცოდნა საქართველოს ისტორიისა და სოციალურ-პოლიტიკური სტრუქტურის შესახებ.
ჩემთვის ის [თემურ ქათამაძე] არის პატრიოტი, ქართული კულტურის აქტივისტი და ვეტერანი. მისმა დაკავებამ მეც და ყველა დაგვამწუხრა. უფრო მეტიც, ის ფაქტი, რომ ქათამაძე ვერ იღებს საქართველოს მოქალაქეობას და ვერც ლტოლვილის სტატუსს, ძალიან არადემოკრატიული და მიუღებელია. ეს დამოკიდებულება არის რეალობა, რომელიც ზიანს აყენებს საქართველოს იმიჯს მსოფლიო მასშტაბით და პოლიტიკურად ეწინააღმდეგება ადამიანის უფლებათა საყოველთაო ღირებულებებს…
დიასპორაში მცხოვრები ეთნიკური ლაზებისა და ქართველებისთვის სასიცოცხლოდ მნიშვნელოვანია, საქართველოს ჰყავდეს დემოკრატიული და მსოფლიოს მიმართ ღია ხელისუფლება.
მიუხედავად იმისა, რომ დასავლეთ ევროპაში ვცხოვრობ, მე საქართველოდან ვარ და ეს ჩემი მიწაა. სოლიდარობა გაფფარ ილმაზის კვლევას „ქართველთა დიასპორის“ მიმართ,“ – აღნიშნულია სელმა კოჩივას წერილში.
იმის გამო, რომ საქართველოდან პროევროპული პროტესტის გამო აძევებენ და ლტოლვილის სტატუსსაც არ ანიჭებენ, თემურ ქათამაძე [გაფფარ ილმაზი] პროტესტის ნიშნად 48 დღე შიმშილობდა. ხელახლა შიმშილობა „ბათუმელმა მედროშემ“ 2025 წლის პირველ აპრილს დაიწყო და 5 აპრილს შეწყვიტა. ბათუმელი მედროშის თქმით, ხელახლა შიმშილობით მან სოლიდარობა ჭიათურელ მეშახტეებს გამოუცხადა.
თემურ ქათამაძე 2025 წლის 11 იანვრის აქციაზე ადმინისტრაციული წესით დააკავეს, შემდეგ კი შსს-მ მისი საქართველოდან გაძევება მოითხოვა.
თემურ ქათამაძეს არ აქვს საქართველოს მოქალაქეობა და ბინადრობა. მის ინტერესებს ახალგაზრდა იურისტთა ასოციაცია იცავს.
დაკავების დროს, როგორც თემურ ქათამაძე ამბობს, მასზე ფიზიკურად იძალადა ბათუმის პოლიციის უფროსმა ირაკლი დგებუაძემ.
