სტამბოლის მთავარმა პროკურატურამ 23 მარტს სტამბოლის მერიასთან საპროტესტო აქციის შედეგად დაკავებული 139 პირის წინააღმდეგ საბრალდებო დასკვნა წარადგინა.
აქციაზე დაკავებულებს, რომელთა უმრავლესობაც სტუდენტია, ბრალად ედებათ კანონის დარღვევა შეხვედრებისა და დემონსტრაციების შესახებ, რაც სამ წლამდე თავისუფლების აღკვეთას ითვალისწინებს.
თურქული გამოცემა „ბიანეტის“ ცნობით, ბრალდებაში ნახსენებია დემონსტრაციის აკრძალვა, რომელიც მოქმედებდა სტამბოლში მაშინ, როდესაც საპროტესტო აქცია ტარდებოდა და პოლიცია დემონსტრანტებს დაშლას სთხოვდა, რაც არ შესრულდა.
მიუხედავად აკრძალვისა, მთავარი ოპოზიციური რესპუბლიკური სახალხო პარტია (CHP) 19 მარტიდან – მას შემდეგ, რაც სტამბოლის მერი ექრემ იმამოღლუ დააკავეს, ზედიზედ შვიდი ღამის განმავლობაში მართავდა აქციებს მერიის წინ, რომელშიც ათასობით ადამიანი მონაწილეობდა. პროტესტი სხვა ქალაქებშიც იმართებოდა.
პროკურორებმა გარდა სამ წლამდე თავისუფლების აღკვეთისა, 139 დაკავებულისთვის ასევე მოითხოვეს თურქეთის სისხლის სამართლის კოდექსის 53/1 მუხლის გამოყენება, რომელიც მოიცავს ისეთ ჯარიმებს, როგორიცაა: საჯარო სამსახურში მუშაობის უფლების ჩამორთმევა და პოლიტიკური უფლებების შეზღუდვა.
სტამბოლის მერის დაკავების შემდეგ, საპროტესტო აქციებზე 1800-ზე მეტი ადამიანი დააკავეს და მათგან 301-ზე დაიწყო გამოძიება.
ადვოკატმა თუბა ტორუნმა, რომელიც დაკავებული სტუდენტების წარმომადგენელია, „ბიანეტთან“ საუბრისას განმარტა, რომ გუბერნატორის მიერ გამოცხადებული საპროტესტო აკრძალვა თავად არის უკანონო, რადგან თურქეთის კონსტიტუციის 34-ე მუხლით გარანტირებულია შეკრების და მშვიდობიანი დემონსტრაციის უფლება წინასწარი ნებართვის გარეშე.
_____________________________
მთავარი ფოტო: „ბიანეტი“
