სოზარ სუბარის ტყუილი მზია ამაღლობელის საქმეზე სასამართლომაც დაადასტურა

13 მარტს ბათუმის საქალაქო სასამართლოში ჟურნალისტისა და მედიამენეჯერის, მზია ამაღლობელის ადმინისტრაციული დაკავების საქმეზე მიმდინარე სასამართლო სხდომაზე კიდევ ერთხელ დადასტურდა, როგორ მოიტყუა „ქართული ოცნების“ პარლამენტის თავმჯდომარის მოადგილემ, სოზარ სუბარმა მზია ამაღლობელის საქმეზე საუბრისას.

სოზარ სუბარმა ტელეკომპანია „იმედის“ გადაცემა „იმედი Live“-ის ეთერში თქვა, თითქოს მზია ამაღლობელი 11 იანვარს დააკავეს იმის გამო, რომ ის სტიკერებს აკრავდა პოლიციელს ზურგზე.

„…ჩვენ ვნახეთ, რომ როდესაც მან გააკრა სტიკერი პოლიციელს ზურგზე, არ მგონია ეს ნორმალური საქციელი, რა გითხრათ, ადმინისტრაციული წესით დააკავეს და იქვე გაუშვეს“, – თქვა სოზარ სუბარმა 6 თებერვალს, „იმედის“ ეთერში.

სუბარი ერთადერთი არ არის „ოცნების“ ლიდერებიდან, რომელიც ცდილობდა დეზინფორმაციის გავრცელებას მზია ამაღლობელის პირველ დაკავებასთან დაკავშირებით. 29 იანვარს „ოცნების“ პრემიერმა, ირაკლი კობახიძემ, ასევე „იმედი Live“-ის ეთერში თქვა, რომ თითქოს მზია ამაღლობელი „სტიკერებს აკრავდა პოლიციელებს“.

„რაც შეეხება ფაქტებს, ფაქტი იყო ასეთი – ჯერ იყო პირველი ინციდენტი, როცა სტიკერებს აკრავდა პოლიციელებს ეს ადამიანი“, – თქვა კობახიძემ.

სინამდვილეში, 11 იანვარს, ბათუმის პოლიციის დეპარტამენტთან მიმდინარე აქციაზე მზია ამაღლობელმა სტიკერი, რომელზეც ეწერა – „იფიცება საქართველო“ – გააკრა პოლიციის შესასვლელთან, დამხმარე ნაგებობაზე გააკრა და ამის ამსახველი ვიდეოჩანაწერიც არსებობს, რის შესახებაც მზია ამაღლობელის დაკავების პირველსავე დღეს იყო ცნობილი და არც ერთ პირს, გარდა „ოცნების“ ლიდერებისა, არ უთქვამს, რომ მზია ამაღლობელმა პოლიციელს მიაკრა სტიკერი.

• ნახეთ ვიდეო: 

ეს ფაქტი 13 იანვარს, ბათუმის საქალაქო სასამართლოში, ვიდეომტკიცებულების საფუძველზე დაადასტურა მოსამართლე სალიხ შაინიძემ.

„ჩვენ დღევანდელ სხდომაზე გამოვიკვლიეთ ვიდეომტკიცებულებები და მე ვაფიქსირებ სასამართლო სხდომის ოქმში, რომ ვიდეომტკიცებულებების გამოქვეყნების შედეგად სასამართლოს დადასტურებულად მიაჩნია – პირველი შემთხვევა არის სტიკერის მიკვრის, ბესელიამ თუ დგებუაძემ, ბესელიამ მგონი ხელი მოკიდა და არ გაუწევია წინააღმდეგობა მზიას, შეჰყვა მას პოლიციას ეზოში. შენობაში მეორე ჩანაწერია ასევე, სადაც ირაკლი დგებუაძე ამბობს – „150-ე მუხლით დავაკავეთ“, ეს ორი ფაქტი სასამართლოს დადასტურებულად მიაჩნია“, – განაცხადა მოსამართლემ.

• რა ხდება

„ნეტგაზეთისა“ და „ბათუმელების“ დამფუძნებელი მზია ამაღლობელი 11-12 იანვარს ღამით ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს. ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა მიიღო.

მზია ამაღლობელის პატიმრობის საფუძველი გაყალბებული ოქმი გახდა – ადმინისტრაციული დაკავების ოქმის მიხედვით, მზია ამაღლობელი პოლიციელების სიტყვიერი შეურაცხყოფის გამო დააკავეს [ასკ-ის 173-ე მუხლი], დაკავების დროს გადაღებულ ვიდეო კადრში კი ისმის ბათუმის პოლიციის უფროსის, ირაკლი დგებუაძის ხმა, რომ მზია ამაღლობელს სტიკერის გაკვრისთვის აკავებენ ასკ-ის 150-ე მუხლით. ამ მუხლით პირის დაკავების უფლება პოლიციას საერთოდ არ აქვს.

სწორედ გაყალბებული ოქმის საფუძველზე მოითხოვა პროკურორმა ვლადიმერ თურმანიძემ მზია ამაღლობელის პატიმრობა სისხლის სამართლის საქმეზე. მოსამართლე ნინო სახელაშვილი ამ გაყალბებულ ოქმს დაეყრდნო.

13 თებერვალს მზია ამაღლობელის ადვოკატებმა სასამართლოს შუამდგომლობით მიმართეს და მისთვის აღკვეთის ღონისძიების სახით შეფარდებული პატიმრობის გაუქმება მოითხოვეს. თუმცა, 14 თებერვალს, ბათუმის საქალაქო სასამართლოს მოსამართლე ლევან ყოლბაიამ დაუშვებლად ცნო შუამდგომლობა მზია ამაღლობელისთვის აღკვეთის ღონისძიების შეცვლის თაობაზე.

დღეს, 19 თებერვალს, ქუთაისის სააპელაციო სასამართლოს მოსამართლე ვერა დოლიძემ ასევე უარი თქვა მზია ამაღლობელის სარჩელის განხილვაზე და ის დაუშვებლად მიიჩნია.

მზია ამაღლობელი უკანონო პატიმარია. პროტესტის ნიშნად იგი 38 დღე შიმშილობდა და შიმშილობა 18 თებერვალს შეწყვიტა.

ამჟამად ბათუმის საქალაქო სასამართლოში მზია ამაღლობელის ორი საქმე მიმდინარეობს – ადმინისტრაციული [ სტიკერის გაკვრაზე, გაყალბებული ოქმით] და სისხლის სამართლის – პოლიციელზე თავდასხმის ბრალდებით.

მზია ამაღლობელის ადმინისტრაციული დაკავების საქმეზე გადაწყვეტილება მოსამართლე სალიხ შაინიძემ 18 მარტს უნდა გამოაცხადოს. ამავე დღეს ბათუმის საქალაქო სასამართლოში გაიმართება პროცესი მზია ამაღლობელის სისხლის სამართლის საქმეზე.