კლიმატის მონიტორინგის ევროპული სამსახურის (C3S) მონაცემებით, მსოფლიოს ოკეანეებში ყინულის საფარი ყველაზე დაბალ მაჩვენებლამდე შემცირდა.
2015 წლის 7 თებერვლის მდგომარეობით, არქტიკასა და ანტარქტიდაში ყინულის საფარის საერთო ფართობი იყო 16, 04 მილიონი კვადრატული კილომეტრი, რაც ყველაზე დაბალი მაჩვენებელია 1979 წლის შემდეგ.
ინფორმაცია ამის შესახებ კლიმატის მონიტორინგის ევროპულმა სამსახურმა, Copernicus-მა გაავრცელა.
ამავდროულად, კლიმატის მონიტორინგის ევროპული სამსახური იტყობინება, რომ 2025 წლის თებერვალი იყო მესამე ყველაზე თბილი თვე, რაც კი დაფიქსირებულა კლიმატის დაკვირვებიდან დღემდე პლანეტაზე. თებერვლის საშუალო გლობალური ტემპერატურა 1,59 გრადუსით მეტი იყო, ვიდრე პრეინდუსტრიულ ეპოქაში.
„განსაკუთრებით შემაშფოთებელია ორივე პოლუსზე ზღვის ყინულის არეალის ერთდროულად შემცირება“ – ციტირებს გერმანული გამოცემა „დოიჩე ველე“ ბრიტანეთის საზღვაო კვლევების ეროვნული ინსტიტუტის მკვლევარ – სიმონ ჯოზის. მკვლევარი მიიჩნევს, რომ ზღვისა და ატმოსფეროს მაღალმა ტემპერატურამ შეიძლება გამოიწვიოს ის, რომ ზამთარშიც კი პრაქტიკულად არ მოხდება ახალი ყინულის წარმოქმნა ანტარქტიდაში.
