დღეს, 24 თებერვალს, ბათუმში ინტენსიურად თოვს. თოვლის საფარის სიმაღლე, ბოლო მონაცემებით, ნახევარ მეტრზე მეტია.
ბათუმში ამ დროისთვის 380-მდე აბონენტს ბუნებრივი აირი არ მიეწოდება.
კომპანია „სოკარის“ ინფორმაციით, ამ დროისთვის ბუნებრივი აირი არ მიეწოდება თამარის გამზირზე N5 და N9 ორი კორპუსის 80 აბონენტს. თუმცა, როგორც კომპანიაში გვეუბნებიან, ბუნებრივი აირის მიწოდება ამ მისამართზე მალე აღდგება. „წასული არიან ჩართვაზე“ – გვითხრეს კომპანიაში.
ბუნებრივი აირი არ მიეწოდება მაჭახელას N19-ში 25 აბონენტს. „მიწოდება აღდგება დღეს“- ამბობენ კომპანიაში.
ბარათაშვილის და მელაშვილის კვეთაში ერთ-ერთი კორპუსის 20 აბონენტს არ მიეწოდება ბუნებრივი აირი. კომპანიის ინფორმაციით, გაზის მიწოდება ამ მისამართზეც დღეს უნდა აღდგეს.
თაყაიშვილის N64-ში ბუნებრივი აირი არ მიეწოდება 40 აბონენტს, ასევე, რეჯებ ნიჟარაძის N25-ში გათიშულია 150 აბონენტი. ამ მისამართზე, როგორც „სოკარში“ ამბობენ, მიწისქვეშა გაყვანილობაზეა პრობლემა. „ექსკავატორი გზაშია და შევეცდებით აღვადგინოთ დღეს“- გვეუბნებიან კომპანიაში.
ბუნებრივი აირი ასევე არ მიეწოდება ფრიდონ ხალვაშის N130-ს, სადაც 25 აბონენტია გათიშული. ასევე, ფარნავაზ მეფის N131-ში, გათიშულია 40 აბონენტი.
„სოკარის“ თქმით, აღნიშნულ მისამართებზე ბუნებრივი აირის მიწოდება დღეს უნდა განახლდეს.
