„ძლიერი საქართველოს“ ერთ-ერთმა ლიდერმა, ანა ნაცვლიშვილმა, დღეს, 29 იანვარს, გამართულ ბრიფინგზე გენპროკურორს მიმართავა და მზია ამაღლობლის საქმეს გამოეხმაურა. „ბათუმელებისა“ და „ნეტგაზეთის“ დამფუძნებელი, მზია ამაღლობელი დაკავების დღიდან უკვე 18 დღეა შიმშილობს პროტესტის ნიშნად.
„ჟურნალისტი მზია ამაღლობელი მის წინააღმდეგ განხორციელებული სასტიკი უსამართლობის და შეურაცხყოფის პასუხად მე-18 დღეა საპატიმროში შიმშილობს. ჩვენ ვიცით, რომ მზია ამაღლობელი არის ივანიშვილის რუსული რეჟიმის ტყვე. არც ერთ ადამიანს, რომელმაც ეს საქმე შეთითხნა, არ ჰქონდეს მოლოდინი, რომ ამოეფარება ჯგუფურ პასუხისმგებლობას, ამოეფარება რეჟიმს და მომავალში თავს იმით გაიმართლებს, რომ „მაშინ ასეთი დრო იყო“.
მინდა მივმართო გიორგი გაბიტაშვილს, რომელსაც სახელისა და გვარის გასწვრივ უწერია, რომ არის საქართველოს გენერალური პროკურორი.
ბატონო გიორგი, თქვენ ძალიან კარგად იცით, რომ მზია ამაღლობელი დღეს არათუ პატიმრობაში უნდა იყოს, არამედ მის წინააღმდეგ საქმე საერთოდ არ უნდა დაგეწყოთ, რადგან კანონით და არა პროპაგანდით, რომელსაც „ქართული ოცნება“ ამუშავებს „მზია ამაღლობლის საქმეზე, ქმედება, რომელსაც მას ედავებით, არ ქმნის დანაშაულის შემადგენლობას, რომლის გამოც ის გამომწყვდეული გყავთ ციხეში.
პროპაგანდა კი აქტიურად მუშაობს, მაგრამ თქვენ, როგორც იურისტმა, ძალიან კარგად და ზუსტად იცით, რომ ეს პატიმრობა არის აბსოლუტურად უკანონო და დაუსაბუთებელი. ამიტომ მინდა მოგმართოთ პირდაპირ ეთერში კითხვით: პირადად თქვენ, მზად ხართ, რომ მთელი ცხოვრება ზიდოთ ამაღლობლის უკანონო პატიმრობისა და მისი ჯანმრთელობის ხელყოფის სიმძიმე? მზად ხართ, რომ ამ სიმძიმით იცხოვროთ?
ამიტომ მოგმართავთ პირს, რომელსაც კანონით გაქვთ შესაძლებლობა: დაუყოვნებლივ დააყენოთ მზია ამაღლობლის გათავისუფლების საკითხი სასამართლოში და ამაღლობლის წინააღმდეგ მიმდინარე საქმე, რომელსაც არ გააჩნია არც სამართლებრივი და არც არანაირი ზნეობრივი გამართლება, დაუყოვნებლივ იყოს შეწყვეტილი,“ – განაცხადა ანა ნაცვლიშვილმა.
- რა ხდება?
„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.
ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.
მზია ამაღლობელი დაკავების დღიდან პროტესტის ნიშნად შიმშილობს.
