ბათუმის სახელმწიფო საზღვაო აკადემიის ადმინისტრაციის მიერ თანამშრომლებისთვის რუსული დროშის გამოსახულებიანი მისალოცის ელექტრონულად გაგზავნის გამო აკადემიის ადამიანური რესურსების მართვის დეპარტამენტის ხელმძღვანელმა და კიდევ ერთმა თანამშრომელმა სამსახური დატოვეს.
აკადემიის პრესსამსახურის ცნობით, მათ პირადი გადაწყვეტილებით, განცხადებით მიმართეს აკადემიის ხელმძღვანელობას სამსახურიდან განთავისუფლების მოთხოვნით.
„ინფორმაცია დასვენების დღეებთან დაკავშირებით, მილოცვასთან ერთად ელექტრონულ ფოსტაზე აკადემიის თანამშრომლებს გაუგზავნა ადამიანური რესურსების მართვის დეპარტამენტმა, რომელსაც ამავე დეპარტამენტის თანამშრომელმა თავისი ინიციატივით თან დაურთო საძიებო სისტემიდან აღებული მისალოცი ბარათი.
ფაქტს მოჰყვა დაუყოვნებელი რეაგირება ბათუმის სახელმწიფო საზღვაო აკადემიის ადმინისტრაციის მხრიდან და მეილები სისტემიდან მალევე წაიშალა. დეპარტამენტის ხელმძღვანელის განცხადებით, შეცდომა თანამშრომლის დაუკვირვებლობით მოხდა.
ადამიანური რესურსების მართვის დეპარტამენტის ხელმძღვანელმა და უშუალო შემსრულებელმა პირადი გადაწყვეტილებით განცხადებით მიმართეს აკადემიის ხელმძღვანელობას სამსახურიდან განთავისუფლებასთან დაკავშირებით – აკადემიის ხელმძღვანელობამ მათი თხოვნა დააკმაყოფილა”.
„ბათუმელებმა“ სცადა გაერკვია, რამდენად ნებაყოფლობით დაწერეს ამ პირებმა სამსახურიდან წასვლის შესახებ გადაწყვეტილება, თუმცა საზღვაო აკადემიის პრესსამსახურმა არც მათი ვინაობა გაასაჯაროვა და არც მათი საკონტაქტო ინფორმაცია მოგვაწოდა.
იმ შემთხვევაში, თუ ეს პირები გადაწყვეტენ განმარტებას, „ბათუმელები“ შემოგთავაზებთ მათ პოზიციას.
