შავ ზღვაში, რუსეთის ტერიტორიულ წყლებში, კრასნოდარის მხარეში გარემოსდამცველებმა 15 დეკემბრიდან 23 დეკემბრის ჩათვლით 19 მკვდარი დელფინის გამორიყვის ფაქტი დააფიქსირეს, რაც, სავარაუდოდ, შავ ზღვაში 2 რუსული ნავთობტანკერის ჩაძირვის შემდეგ ზღვაში ჩაღვრილი ნავთობის შედეგია.
BBC-ი რუსი გარემოსდამცველების ჯგუფის, Delfacenter-ის ექსპერტებზე დაყრდნობით წერს, რომ ეს დელფინების მასობრივი გამორიყვაა. სამეცნიერო-ეკოლოგიური ცენტრი „დელფა“ წერს, რომ გამორიყული დელფინების ნაწილს სხეულზე აღენიშნებათ მაზუთის ფრაგმენტები, ერთ-ერთ მათგანს კი მაზუთის მცირე ფრაგმენტი უპოვეს სასუნთქ გზებში.
„გამორიყვა მასიურად ითვლება, თუ სულ მცირე ორი ვეშაპისებრი ერთსა და იმავე ადგილას და ერთსა და იმავე დროს არის გამოირიყა. კრასნოდარის მხარის სანაპირო ზოლში ასეთი შემთხვევები ძალზე იშვიათია. ეს უკიდურესად საგანგაშო მდგომარეობაა” – წერენ მკვლევარები.
შავ ზღვაში ამ რაოდენობის მაზუთის ჩაღვრის ზიანის მასშტაბი ჯერ კიდევ არ არის სათანადოდ შეფასებული. გარემოსდამცველი საერთაშორისო ორგანიზაცია „გრინფისი“ წერს, რომ დაფიქსირდა მაზუთით დაბინძურებული ფრინველების დაღუპვის ფაქტებიც.
„ნებისმიერი ნავთობის ან ნავთობქიმიური ჩაღვრა ამ წყლებში შეიძლება იყოს სერიოზული. სავარაუდოა, რომ ქარი და დინება (ახლა გადაადგილდება ჩრდილო-აღმოსავლეთისკენ) მის გავრცელებას შეუწყობს ხელს და ამჟამინდელი ამინდის პირობებში, უკიდურესად რთული იქნება მისი შეკავება.
თუ დინება მაზუთს ნაპირზე გარიყავს, ეს გამოიწვევს სანაპირო ზოლის დაბინძურებას, რომლის გაწმენდა ძალიან რთული იქნება…
აუცილებელია შევეცადოთ მინიმუმამდე დავიყვანოთ ნებისმიერი შემდგომი გაჟონვა, თუ ეს შესაძლებელია. გენების ჩაძირვის დროს არსებობს ნავთობისა და ნავთობქიმიკატების გამოყოფის რისკი უფრო ხანგრძლივი პერიოდის განმავლობაში“ – ამბობს დოქტორი პოლ ჯონსტონი, „გრინფისის“ კვლევითი ლაბორატორიების ხელმძღვანელი.
შავ ზღვაში რუსული მოძველებული ნავთობტანკერი „ვოლგონეფტ-2012“ შავ ზღვაში 15 დეკემბერს ჩაიძირა. ტანკერს დაბალი ხარისხის საწვავი – მაზუთი გადაჰქონდა. იმავე დღეს კიდევ ერთ ტანკერს, „ვოლგონეფტ-239-ს“ შეექმნა პრობლემა, რომელსაც ასევე მაზუთი გადაჰქონდა.
ორივე გემზე დაახლოებით 9000 ტონა მაზუთი იყო. „გარდიანის“ თანახმად, ნავთობტანკერებიდან შავ ზღვაში დაახლოებით 4 300 ტონა ნავთობპროდუქტი ჩაიღვარა.
შემთხვევა ოკუპირებულ ყირიმთან ახლოს, ქერჩის სრუტიდან 8 კილომეტრის დაშორებით მოხდა.
რუსული საინფორმაციო სააგენტოების მიერ გავრცელებული ინფორმაციის თანახმად, ეკიპაჟის 11 წევრის გადარჩენა მოხერხდა. დაიღუპა ერთი მეზღვაური.
უკრაინამ მომხდარზე პასუხისმგებლობა რუსეთს დააკისრა და მოუწოდა საერთაშორისო თანამეგობრობას, მიიღონ ზომები რუსული ნავთობის ფლოტის წინააღმდეგ.
