დღეს, 30 ნოემბერს, ღამით, ბათუმში საპროტესტო აქციაზე პოლიციამ რამდენიმე ადამიანი დააკავა.
აქციის მონაწილეების თქმით, დაკავების დროს პოლიციამ ფიზიკურად იძალადა დაკავებულებზე. „ერთი ქალი თმით ათრიეს და ცდილობდნენ ფეხებით ეცემათ. ერთ ქალს კი გული წაუვიდა“- უთხრა აქციის ერთ-ერთმა მონაწილემ „ბათუმელებს“.
პოლიციასა და აქციის მონაწილეებს შორის დაპირისპირება რუსთაველისა და გამსახურდიას ქუჩების კუთხეში მოხდა. „ბათუმელების“ პირდაპირ ჩართვაში მოხვდა კადრები, თუ როგორ აკავებს პოლიცია მშვიდობიანი აქციის მონაწილეებს, მათ შორის, როგორც აქციის მონაწილეები ამბობენ, არასრულწლოვანს.
„ბათუმელები“ შს სამინისტროში აზუსტებს რამდენი ადამიანია დაკავებული.
ბათუმსა და თბილისში საპროტესტო აქციები დღეს, საღამოს, თითქმის ერთდროულად დაიწყო. თბილისში აქციის მონაწილეების წინააღმდეგ პოლიციამ წყლის ჭავლი გამოიყენა.
წინა ღამით კი, ანუ 29 ნოემბერს, პოლიციამ დაარბია თბილისში აქციის მონაწილეები და დააკავა 43 ადამიანი. აქციაზე დაშავდა 20-ზე მეტი ჟურნალისტი.
პოლიციამ ჟურნალისტებზე დღევანდელ აქციაზეც იძალადა.
მოქალაქეები საქართველოს სხვადასხვა ქალაქში „ოცნების“ ანტიკონსტიტუციური ხელისუფლების მიერ ევროკავშირთან გაწევრიანების თაობაზე მოლაპარაკებების შეჩერებას აპროტესტებენ.
