2024 წლის სამი კვარტლის სტატისტიკური მონაცემების თანახმად, საქართველოში უცხო ქვეყნებიდან შემოსული მოქალაქეების მიხედვით, პირველ ადგილზე კვლავ რუსეთის ფედერაციაა.
2024 წელს, იანვრიდან სექტემბრის ჩათვლით, საქართველოში რუსეთიდან 1,489,079 პირი შემოვიდა.
კვარტლების მიხედვით სტატისტიკა ასე ნაწილდება:
- I კვარტალი – 281 504
- II კვარტალი – 438 638
- III კვარტალი – 768 937
სტატისტიკა აჩვენებს, რომ საქართველოში რუსეთიდან შემოსვლის მაჩვენებელი განსაკუთრებით გაიზარდა მესამე კვარტალში, ზაფხულის ტურისტული სეზონისას.
რაც შეეხება საქართველოს საზღვრის დატოვების სტატისტიკას, შინაგან საქმეთა სამინისტროს მონაცემების თანახმად, 2024 წელს, იანვრიდან სექტემბრის ჩათვლით, ქვეყანა დატოვა რუსეთის 1,488,458-მა მოქალაქემ.
საქართველოში რუსეთის მოქალაქეების მასობრივი შემოსვლა 2022 წლის თებერვლის ბოლოს დაიწყო, მას შემდეგ, რაც რუსეთის ფედერაცია თავს დაესხა უკრაინას და ომი დაიწყო.
სტატისტიკის თანახმად, 2022 წელს საქართველოში შემოვიდა რუსეთის 1 459 541 მოქალაქე და ეს იყო 401-პროცენტიანი ზრდა 2021 წელთან შედარებით.
გასულ, 2023 წელს კი, ოფიციალური სტატისტიკის თანახმად, საქართველოში რუსეთის 1 856 237 მოქალაქე შემოვიდა და 1 887 223 – გავიდა.
„ბათუმელებმა“ იუსტიციის სამინისტროს სახელმწიფო სერვისების განვითარების სააგენტოდან გამოითხოვა საჯარო ინფორმაცია, რუსეთის რამდენმა მოქალაქემ მოითხოვა საქართველოს მოქალაქეობა და აქედან რამდენი განცხადება დაკმაყოფილდა, თუმცა სააგენტომ ეს ინფორმაციამ არ მოგვაწოდა.
______________
ფოტოზე: 2022 წლის სექტემბერი, ლარსი. ფოტო: ზურაბ ქურციკიძე/ევროპის პრესფოტო სააგენტო/EPA-EFE
ამავე თემაზე:
მთავრობა მალავს რუსეთიდან შემოსულ რამდენ მოქალაქეს აქვს ხმის მიცემის უფლება
