“პერსონალურ მონაცემთა დაცვის სამსახურმა მედიასაშუალება – „ბათუმელების“ მიერ გავრცელებული ინფორმაციის საფუძველზე, დაიწყო ამავე მედიასაშუალების მიერ გამოქვეყნებულ სტატიაში ამომრჩევლების მონაცემების დამუშავების თაობაზე მითითებული ფაქტის შესწავლა,” – ვკითხულობთ პერსონალურ მონაცემთა დაცვის სამსახურის მიერ გავრცელებულ განცხადებაში.
„ბათუმელებმა” 15 ოქტომბერს გამოაქვეყნა სტატია, რომელშიც აღწერილია „ქართული ოცნების“ პარტიულ ოფისში წინასაარჩევნოდ ათობით ათასი ადამიანის შესახებ განსაკუთრებული კატეგორიის პერსონალური მონაცემების დამუშავების მასობრივი სქემა. მონაცემთა რაოდენობიდან და ხასიათიდან გამომდინარე, არ არსებობს კანონიერი გზა, რომლითაც რომელიმე პოლიტიკურ პარტიას შეუძლია მსგავსი ინფორმაციის მოპოვება და დამუშავება.
პერსონალურ მონაცემთა დაცვის სამსახური განცხადებაში ასევე აღნიშნავს, რომ საარჩევნო პერიოდში ამომრჩევლებისთვის პირადობის დამადასტურებელი დოკუმენტების ჩამორთმევის ფაქტები მის კომპეტენციას სცდება და მისი შესწავლა სამართალდამცავი ორგანოების ფუნქციას განეკუთვნება.
__________________________________________________________
