აჭარის უმაღლესი საბჭოს დეპუტატობის კანდიდატი „ოცნებიდან“, ცოტნე ანანიძე, 16 ოქტომბერს „ქართული ოცნების“ სხვა წარმომადგენლებთან ერთად მასწავლებლის საერთაშორისო დღისადმი მიძღვნილ ღონისძიებას დაესწრო ქობულეთში. ამ ღონისძიებაზე 30-ზე მეტი მასწავლებელი დააჯილდოვეს. შეხვედრის ამსახველი ფოტოები ცოტნე ანანიძემ თავადვე გამოაქვეყნა ფეისბუკის საკუთარ გვერდზე და იქვე აღნიშნა, რომ ღონისძიების ორგანიზატორი ქობულეთის მერია იყო.
ცოტნე ანანიძე „ოცნების“ უმაღლესი საბჭოს სიაშია, წინასაარჩევნო კამპანიის პერიოდში კი კანდიდატს ბიუჯეტით დაფინანსებული ღონისძიების აგიტაციისთვის გამოყენება ეკრძალება. შეხვედრაში მონაწილეობა, სადაც მასწავლებლები დააჯილდოვეს, შეიძლება ადმინისტრაციული რესურსის გამოყენებად ჩაითვალოს, მიუხედავად იმისა დადგინდება თუ არა აგიტაციის ფაქტი, რადგან კანდიდატი შესაძლოა გადაწყვეტილების ერთ-ერთ მიმღებ პირადაც განიხილოს ვინმემ, ან უმეტესობამ.
საარჩევნო კოდექსის 45-ე თავის მიხედვით, მუნიციპალიტეტის ბიუჯეტის დაფინანსებით ორგანიზებულ ღონისძიებაზე წინასაარჩევნო აგიტაციის გაწევა ადმინისტრაციული რესურსების გამოყენებად ითვლება.
ფოტო ცოტნე ანანიძის Facebook გვერდიდან
ფოტო ცოტნე ანანიძის Facebook გვერდიდან
ცოტნე ანანიძე თავის გვერდზე ასევე წერს, რომ ამავე დღეს “საზოგადოებრივ ცენტრში” შეხვდა ამბულატორიის თანამშრომლებს, სამედიცინო პუნქტების ექიმებსა და ექთნებს. ისინი მერიის თანამშრომლები არიან, რადგან „საზოგადოებრივი ცენტრი“ ქობულეთის მერიის ორგანიზაციაა.
„ბათუმელები“ ცოტნე ანანიძეს დაუკავშირდა კითხვით, რა განზრახვით იმყოფებოდა შეხვედრაზე და მიმართა თუ არა აუდიტორიას, როგორც „ოცნების“ კანდიდატმა.
„უმაღლესი საბჭოს წევრი ვარ, მაჟორიტარული წესით არჩეული ქობულეთიდან. მიწვეული ვიყავი. დიახ, [აუდიტორიას] მივმართე. მადლიერებით, მათი ღვაწლისა და დამსახურების გამო“, – წერილობით გვიპასუხა ცოტნე ანანიძემ.
მის მიერ გავრცელებულ ფოტომასალაში ვხედავთ ასევე, რომ ამ შეხვედრას „ოცნების“ კიდევ ერთი კანდიდატი გიორგი ჭყონიაც ესწრება. თუ ეს რიგითი შეხვედრა იყო, სადაც ცოტნე ანანიძე, როგორც მოქმედი უმაღლესი საბჭოს დეპუტატი მონაწილეობდა, მაშინ რატომ ესწრებოდა შეხვედრას გიორგი ჭყონია? – ის არც საჯარო მოხელეა და არც დეპუტატი. ისიც „ოცნების“ კანდიდატია. მით უმეტეს, რომ ორივე ღონისძიება დაფინანსებულია ბიუჯეტიდან.
ფოტო ცოტნე ანანიძის Facebook გვერდიდან
17 ოქტომბერს მასწავლებლის ეროვნული დღისადმი მიძღვნილი საზეიმო ღონისძიება გაიმართა ხულოშიც. ღონისძიებას ესწრებოდა ანზორ ბოლქვაძე, „ოცნების“ საპარლამენტო სიის წევრი, ფრიდონ ფუტკარაძე, „ოცნების“ უმაღლესი საბჭოს სიის წევრი, აჭარის განათლების კულტურისა და სპორტის მინისტრი მაია ხაჯიშვილი, ხულოს მუნიციპალიტეტის მერის მოვალეობის შემსრულებელი ჯამბულატ მელაძე და სხვა მმართველი პირები ხულოს მერიიდან.
ფოტო ანზორ ბოლქვაძის Facebook გვერდიდან.
ამ შემთხვევაშიც, ღონისძიება ხულოს მერიის საბიუჯეტო სახსრებით დაფინანსდა. „ბათუმელები“ შეეცადა დაჰკავშირებოდა ანზორ ბოლქვაძეს კომენტარისთვის, თუმცა მან ჩვენ სატელეფონო ზარს არ უპასუხა.
რაზე მეტყველებს „ქართული ოცნების“ კანდიდატების მსგავს ღონისძიებებში მონაწილეობა? – ამის შესახებ „ღია სივრცე კავკასიას“ ერთ-ერთ დამფუძნებელს, იურისტ ირმა პავლიაშვილს ვკითხეთ. იგი მიიჩნევს, რომ საკითხის შესწავლა აუცილებელია:
„შეიძლება ადგილი ჰქონდეს ადმინისტრაციული რესურსის გამოყენებას ან უკანონო აგიტაციას. რა თქმა უნდა, უფრო სიღრმისეული შესწავლაა აუცილებელი“, – გვითხრა მან.
რა არის ადმინისტრაციული რესურსის გამოყენება ან უკანონო აგიტაცია? – ესაა შემთხვევა, როდესაც პოლიტიკური, საარჩევნო მიზნით ხდება [ღონისძიებებში] საჯარო მოხელეების ჩართვა და ბიუჯეტით დაფინანსებული ღონისძიებების გამოყენება.
„წინასაარჩევნო პერიოდში შესაძლებლობათა თანასწორობა დაცული იყოს უნდა საარჩევნო სუბიექტებისთვის. ასევე, ეს შემთხვევები შეიძლება შეიცავდეს უკანონო აგიტაციის ნიშნებს, მიუხედავად იმისა, რომ პოლიტიკური თანამდებობების პირებს უფლება აქვთ ჩაერთონ აგიტაციაში და მათ შორის სამსახურებრივი მოვალეობის დროს განახორციელონ აგიტაცია. თუმცა მათ არ უნდა გამოიყენონ ადმინისტრაციული რესურსი და დაქვემდებარებული პირები არ უნდა ჩააბან სააგიტაციო ღონისძიებებში.
თავად საჯარო მოხელეებს აქვთ აკრძალული სამუშაო საათების განმავლობაში აგიტაციის განხორციელება. შესაბამისად, საჭიროა ფაქტის დეტალური შესწავლა, რომ სათანადო რეაგირება მოჰყვეს შესაბამისი უწყებებიდან“, – ამბობს ირმა პავლიაშვილი.
იგი მიიჩნევს, რომ მსგავსი ფაქტები ნეგატიურ გავლენას ახდენას თანასწორ და სამართლიან საარჩევნო გარემოზე და სწორედ ამიტომაა მნიშვნელოვანი პასუხისმგებელი პირების გამოკვეთა. ირმა პავლიაშვილი ჩვენთან საუბარში ასევე ხაზს უსვამს საერთაშორისო სტანდარტებს:
„საინტერესოა საერთაშორისო სტანდარტები, კოპენჰაგენის დოკუმენტი, რომელიც გვეუბნება, რომ სახელმწიფო ფუნქციები და პოლიტიკური პარტიების საქმიანობა ერთმანეთისგან უნდა იყოს გამიჯნული. მათი აღრევა ნიშნავს, რომ გარკვეული სუბიექტის სასარგებლოდ ხდება შემდგომ მთელი რიგი აქტივობები, რათა მან დადებითი ბენეფიტები მიიღოს წინასაარჩევნო პერიოდში“.
ამ დრომდე ცესკოში აჭარიდან 13 საჩივარი იყო შესული. 18 ოქტომბერს ეს რიცხვი კიდევ გაიზარდა. საჩივრები განხილვის პროცესშია.
_________________________
ამავე თემაზე:
99 პირი ერთი უბნის გადასატანი ყუთის სიაში რიგის ნომრების გარეშე – 13 საჩივარი ცესკოში აჭარიდან
