„თამუნა უკვე 15 წლისაა. ვერ დადის და ვერ საუბრობს. არაფერზე არ აქვს რეაქცია. ჩემი ხელით ვაჭმევ, ვუცვლი. ქმარს გაშორებული ვარ. მეუღლემ მიგვატოვა ბავშვის მდგომარეობიდან გამომდინარე. მთელი ეს წლები ვცხოვრობთ ქირაში და ყველაფერს ვუმკლავდები მარტო”, – გვეუბნება ქრისტინე გაბუნია, 33 წლის მარტოხელა დედა ქუთაისიდან.
იგი გვეუბნება, რომ მათი ოჯახის ერთადერთი შემოსავალი ბავშვის პენსიაა, 315 ლარი, თუმცა როგორც დედა ამბობს, თამუნაზე რომ ეზრუნა იძულებული გახდა კრედიტი გამოეტანა ბანკიდან – „თამოს პენსიის ნაწილს ბანკში ვიხდით. მისი ყოველთვიური მკურნალობა ძალიან ძვირი ჯდება. დაახლოებით 2 000 ლარი”
დედის თქმით, რადგან შვილის ხანგრძლივად დატოვება არ შეუძლია, ერთადერთი, რასაც ახერხებს, პერიოდულად სასაფლაოს დალაგებაა. ქალი გვეუბნება იმასაც, რომ თამუნას საკუთარი ეტლი არ აქვს და დიდი ხანია რაც უშედეგოდ ცდილობს მისთვის ახალი ეტლის შეძენას. ქრისტინე ამბობს, ეტლი, რომელსაც ახლა თამუნა იყენებს, ნათხოვარი აქვთ.
ქრისტინე გვიამბობს, რომ თამუნა 7 თვის იყო, როცა ჯანმრთელობის პრობლემები დაეწყო:
„როცა წავიყვანე ექიმთან, ბავშვი მხოლოდ შუქს ხედავდა, სხვა არაფერზე არ ჰქონდა რეაქცია, არც სათამაშოებზე. შემეშინდა. მერე წავიყვანე ოფთალმოლოგთან. მეგონა, რომ ბავშვს მხედველობის პრობლემა ჰქონდა. ექიმმა ნევროპათოლოგთან გაგვიშვა. მივედით, მაგნიტურ რეზონანსული ტომოგრაფია გადავუღეთ და აღმოჩნდა, რომ ბავშვს აქვს „ტვინზე სითეთრეები“, რაც ნიშნავს განუვითარებლობას. ამასთან, კეფაში აქვს კისტა. რაც უფრო იზრდებოდა ბავშვი, უფრო რთულდებოდა მდგომარეობა”.
როგორც დედა გვიხსნის, თამუნას ხანგრძლივი და ეტაპობრივი მკურნალობა სჭირდება, რის გარეშეც მისი განვითარება ბოლომდე გაჩერდება:
„თამუნა მუდმივად იღებს მედიკამენტებს, გვჭირდება საფენებიც.
ამ ეტაპზე, ორი კვირის შემდეგ, აუცილებლად ესაჭიროება მაგნიტურ-რეზონანსული ტომოგრაფიის გადაღება, რათა გადავამოწმოთ, როგორ მიდის მისი მდგომარეობა. ძალიან გაურთულდა შეტევები და ექიმმა გაუზარდა წამლის დოზა. ცოტახანს უნდა დავაკვირდეთ, შემდეგ კი მაგნიტურ რეზონანსული ტომოგრაფია გადავუღოთ, თუ როგორი მდგომარეობაა ბავშვის თავში, კისტა რამდენად გაიწოვა და ა.შ. ყველაფერი უნდა გავაკონტროლოთ, თამუნას ჯანმრთელობის მდგომარეობა რომ არ გაუარესდეს”.
დედამ მოგვაწოდა ცნობა თამუნას ჯანმრთელობის შესახებ, სადაც ვკითხულობთ: „გონებრივი განვითარების ჩამორჩენილობა მკვეთრად გამოხატული ქცევის პათოლოგიით. ბავშვთა ცერებრული დამბლა”.
ქრისტინას სულ ორი შვილი ჰყავს. მასთან ერთად ცხოვრობს უფროსი შვილი, ნატაც.
საუბრის ბოლოს, დედა ამბობს, რომ ამ წლების განმავლობაში ბავშვის მდგომარეობით არც ერთხელ დაინტერესებულა ბავშვის მამა.
„ორსულად რომ ვიყავი, კონფლიქტი მოგვივიდა. მეორე სართულიდან გადავვარდი და ბავშვმა მიიღო მაგ დროს ტრავმა. ექიმთან კონსულტაციაზე რომ ვიყავით, გამომკითხა ფეხმძიმობისას ვირუსი ხომ არ შეგხვედრია ან რაიმე მსგავსიო. ეს ამბავი რომ მოვუყევი, მაშინ მიიღებდა ბავშვი ტრავმასო, ასე მითხრა“ – ამბობს ქრისტინე. მისი თქმით, ყოფილი მეუღლეს არასდროს გადაუხდია ბავშვისთვის ალიმენტი.
____
თამუნას დახმარების მსურველებმა ისარგებლეთ შემდეგი ანგარიშის ნომრებით:
საქართველოს ბანკი – GE39BG0000000589168699
თიბისი ბანკი – GE81TB7722945068100048
მიმღები დედა, ქრისტინე გაბუნია.
