სოფელ კოკოტაურში მცხოვრები გურამ ანანიძე ქედის მერიას კუთვნილ კომპენსაციას სთხოვს.
გურამ ანანიძის სახლი გასული წლის მარტში დაიმეწყრა.
ფერდი, რომელზეც გურამ ანანიძის სახლი მდებარეობს, მეწყრულია. დაბზარულია სახლის საძირკველი ოთხივე მხარეს. 2023 წელს მომხდარი ფაქტის შემდეგ ქედის მერიამ ანანიძეების 9-სულიანი ოჯახი ქირით გაიყვანა.
„2023 წლის 6 მარტს მომიწია გამოსახლება ჩემი სახლიდან, მეწყრის გამო. ხელვაჩაურში მაქვს კერძო სახლის მეორე სართული ნაქირავები. 9 სული ვართ ოჯახში და დიდი ფართი გვჭირდება. აქამდე ვიხდიდი 700 ლარს თვეში. ამ თანხიდან ნახევარს, 350 ლარს ქედის მერია მიფარავდა. ახლა იცით, ყველაფერი გაძვირდა და მეპატრონემაც ქირა გააძვირა 1000 ლარამდე, რისი გადახდის საშუალებაც მე ფიზიკურად არ მაქვს.
ქირით დახმარებას აზრი აღარ აქვს. ისედაც ძალიან მიჭირს იმ ნახევრის გადახდა. ამხელა ოჯახია, ცალკე ბანკი. თან ოჯახს მივხედო, თან ქირა ვიხადო – ვეღარ ვახერხებ. იძულებული ვარ დავბრუნდე სოფელში.
ქედის მერიიდან ვითხოვ, რა კომპენსაციაცაა ჩემზე გათვალისწინებული, ეგ კომპენსაცია მომცენ დროზე და მე მივხედავ ჩემს თავს,“ – უთხრა „ბათუმელებს“ გურამ ანანიძემ.
მისი თქმით, ოჯახი აპირებს კიდევ ერთხელ მიმართოს მერიას და მოითხოვოს კუთვნილი კომპენსაცია, რათა ამ თანხით რამე იყიდოს.
„სახლის საძირკველი დაბზარულია. მიწა დახეთქილია. ქედის მერიიდან მეკუთვნის კომპენსაცია, კანონით გათვალისწინებულია 50 ათასი ლარი. ვითხოვ იმას, რაც მეკუთვნის კანონით. თუ არ მომაქცევენ ყურადღებას, იძულებული ვარ დავბრუნდე ჩემს საცხოვრებელში,“ – გვითხრა გურამ ანანიძემ.
„ბათუმელები“ კომენტარისთვის დაუკავშირდა ქედის მერიის პრესსამსახურს.
„ქირით გაყვანილია უსაფრთხოებიდან გამომდინარე. აღნიშნულ საკითხს განიხილავს კომისია,“ – მოგვწერა ქედის მერიის პრესსამსახურმა.
ქედის მერიაში არ უპასუხეს კითხვებს, როდის მიიღებს მეწყრით დაზარალებული მოქალაქე კუთვნილ კომპენსაციას და რა ოდენობით.
_______________
ფოტოზე: გურამ ანანიძის დამეწყრილი სახლი
